काठमाडौं । अमेरिकाको टेक्सासमा आफ्ना पाँच छिमेकीको हत्या गर्ने संदिग्धलाई प्रहरीले हिरासतमा लिएको छ ।

३८ वर्षीय फ्रान्सिस्को ओरोपेसालाई टेक्सासको कट एण्ड शुट सिटीबाट पक्राउ गरिएको हो । उनी घरमा लुगाको थुप्रोमुनि लुकेर बसेका थिए ।

टेक्सासको ह्युस्टनमा शुक्रबार पाँच जनाको हत्या भएको थियो । आरोपितसँगको विवादपछि हत्या भएको प्रहरीको अनुमान छ ।

आरोपित फ्रान्सिस्कोले आफ्नो एआर १५ सेमी अटोमेटिक राइफलले गोली चलाउने अभ्यास गरिरहेको बेला उनका छिमेकीहरूले विरोध गरे। यस विषयमा विवाद भएपछि आरोपीले छिमेकीमाथि गोली प्रहार गरेका थिए ।

टेक्सास प्रहरी अधिकारीहरूले मंगलबार पत्रकार सम्मेलन गरी हेल्पलाइनमा प्राप्त सूचनाका आधारमा आरोपीलाई पक्राउ गरिएको बताए ।

अभियुक्तलाई पक्राउ गर्न सहयोग गर्नेलाई ८० हजार डलर पुरस्कारको घोषणा गरिएको थियो । अमेरिकाका विभिन्न अनुसन्धान एजेन्सीहरूले पाँच दिनदेखि आरोपीलाई पक्राउ गर्ने प्रयास गरिरहेका थिए।