पेरु। पेरुको सुनखानीमा आगलागी हुँदा कम्तीमा २७ जना मृत्यु भएको छ। पेरूको दक्षिणी क्षेत्रमा अवस्थित सुदूर कोन्डेसुयोस प्रान्तको सुनखानीमा आगलागी हुँदा २७ जना कामदारको मृत्यु भएको हो।

प्रहरी अधिकारीका अनुसार एरिक्विपा क्षेत्रमा अवस्थित ला एस्पेरान्जा खानी भित्रको सुरुङमा विधुतीय सर्ट हुँदा आगलागी सुरु भएको थियो। सो दुर्घटना हेरेका सरकारी अधिकारी जियोभान्नी माटोसका अनुसार खानी भित्र थुनिएका सबै २७ जनाको मृत्यु भएको छ।

स्थानीय सञ्चारमाध्यमका अनुसार खानीमा एक्कासी विस्फोट आवाज सुनिएको थियो। र, वरपर त्रासको वातावरण देखा परेको थियो। प्रहरीले भने खानीमा भएको आगलागी परी मृत्यु भएकाको विवरण संकलन गरेपछि मात्रै आगलागीको खबर सार्वजनिक गरेको हो।