मुम्बई। अभिनेता नवाजुद्दीन सिद्दीकी र उनकी पत्नी आलिया सिद्दीकी निजी जीवनका कारण चर्चामा छन्। हालैमात्र आलियाले नवाजुद्दीन र उनकी आमाविरुद्ध आफुमाथि कुटपिटको आरोप लगाउँदै मुद्दा दायर गरेकी थिइन्।

यिनै आलियाले सञ्जालमा नवाजले गरेको गल्तीलाई माफी दिँदै मुद्धा फिर्ता लिएर भविष्य उज्जवल बनाउने घोषणा गरेकी छन्। उनले अतितको चक्रव्यूमा फस्नु राम्रो नभएकाले गल्ती पुनः नदोहो¥याउने प्रतिबद्धता जनाउँदै सन्तानको भविष्यका लागि यो निर्णय लिएको उल्लेख गरेकी छन्।

‘हेल्लो नवाज, यो चिठी तिम्रा लागि हो। मैले कैयौं स्थानमा सुने र पढे कि जिन्दगी चलिरहनुपर्ने विषय हो। हामीबीच केही महिनाअघिसम्म जे भए, म यी सबै कुरालाई भुलेर आफ्नो इश्वरमाथि आस्था राख्दै उनको प्रेरणाबाट आफ्नो गल्तीको लागि माफी माग्छु। तिम्रो गल्तीलाई माफी दिँदै अगाडि बढेर भविष्यलाई राम्रो बनाउने कोशिस गर्नेछु।

अतितमा फस्नु भनेको कुनै चक्रव्यूमा फस्नु जस्तै हो। यसकारण अतितलाई पछाडि छोडेर यस्ता गल्ती फेरी नदोहोर्‍याउने प्रतिबद्धताका साथ हामी बच्चाको भविष्यमा उज्यालो प्रकाश छर्ने प्रण लिन्छौं’, उनले लेखेकी छन्।

उनले नवाजुद्दीन र उनको परिवारमाथि आफूले लगाएको सबै मुद्धा फिर्ता लिने उल्लेख गरेकी छन्। उनले आफूलाई नवाजुद्दीनको कुनै आर्थिक सहयोग पनि नचाहिएको र उनीबाट आर्थिक आशा पनि नराखेको जनाएकी छन्।