काठमाडौं । एक महिलाले आफ्नै श्रीमानको निर्मम हत्या गरिन् । तर अचम्मको कुरा के छ भने उनको वरिपरि बस्ने मानिसहरूले ती महिलालाई अपराधी नभई हिरो भनेका छन् । तीन सन्तानकी आमा रेबेका पायनेलाई मिल्डुरा सर्वोच्च अदालतको १२ न्यायाधीशको बेन्चले हत्या गरेको आरोपमा दोषी ठहर गरेको छ। तर, उनलाई सजाय सुनाउन बाँकी छ ।

घटना अष्ट्रेलियाको एउटा सानो सहरसँग सम्बन्धित छ जहाँ ४३ वर्षीया रेबेकाले आफ्ना ६८ वर्षीय श्रीमान् नोइललाई विषालु बिस्कुट खुवाएर मारिन्। यससँगै उनको शव कम्बलमा बेरेर घरबाहिर राखिएको फ्रिजमा राखिन् । अब अदालतले रेबेकालाई कडा सजाय दिन सक्छ, तर उनको वरपरका मानिसहरूले उनलाई निर्दोष ठान्छन्।

रेबेकालाई चिन्नेहरू बताउँछन् कि उनी आफ्नो विवाहमा यति वर्षसम्म सजाय भोग्दै आएकी थिइन् र उनलाई थप सजाय दिन आवश्यक छैन। रेबेकाका छोरा जेमीले हेराल्ड सनलाई भने- मेरी आमा आफ्नो १४ वर्षको वैवाहिक जीवनमा जनावरसँग बस्दै थिइन् । अब हामी बच्चाहरूलाई उनको आवश्यकता छ।

सुनुवाइका क्रममा रेबेकाले भनिन्– नोइलले उनलाई जबरजस्ती एउटा सानो सहरमा बस्न ल्याएको थियो ताकि उनी आफ्नो परिवार र साथीहरूबाट टाढा रहन सकुन् । रेबेकाले आफूले मानसिक र शारीरिक रूपमा धेरै उत्पीडन सहेको बताइन् । उनले भनेकी छिन् कि नोइलले आफूले चाहेको बेला बलात्कार गर्थे।

रेबेकाले भनिन् कि उनका श्रीमानले जबरजस्ती आफ्नो नामको १८ वटा ट्याटु उनको शरीरको इन्टिमेट एरियामा बनाइदिएका थिए ताकि अरु कोहीलाई उनीसँग माया नहोस् । यससँगै उनले रेबेकालाई पसलको कामबाट पनि निकालिदिए । रेबेकासँग बसेर पसलमा आउने ग्राहकलाई दुर्व्यवहार गर्ने गरेकोले यस्तो भएको हो ।

रेबेकाका छिमेकीहरूले भने कि नोइलको हत्या गरेर रेबेकाले आफ्नो सम्पूर्ण परिवारको ज्यान बचाइन्। यदि उनी राति सुत्छिन् भने, भोलिपल्ट बिहान जीवित रहन्छिन् भन्ने पनि थाहा हुँदैनथ्यो। अर्को छिमेकीले भने कि यदि रेबेकाले उनको हत्या नगरेको भए उनले रेबेका र उनका दुई छोराहरूलाई मार्ने थिए भन्नेमा कुनै शंका छैन। रेबेकाका साथी जोनले यो ठीक नभएको भन्दै रेबेका पीडित भएको बताए ।