काठमाडौं । आर्थिक वर्ष २०२२-२३ मा भारतीय रेलवेले टिकट बिना यात्रा गरेको वा गलत टिकटमा यात्रा गरेकोमा ३.६ करोड यात्रुलाई जरिवाना गरेको छ।

समाचार एजेन्सी पीटीआईको रिपोर्ट अनुसार रेलवेले आरटीआई द्वारा सोधिएको प्रश्नको जवाफमा यो जानकारी दिएको हो।

टिकट नलिई वा गलत टिकट लिएर पक्राउ पर्नेको यो संख्या गत वर्षको तुलनामा करिब एक करोड बढी हो ।

यसअघि सन् २०१९-२० मा १.१० करोड मानिस बिना टिकट वा गलत टिकटमा यात्रा गरेको फेला परेको थियो भने २०२१-२२ मा यो संख्या बढेर २.७ करोड पुगेको थियो।

कोरोना महामारीका बेला २०२०-२१ मा बिना टिकट वा गलत टिकटमा यात्रा गर्दा पक्राउ पर्नेको संख्या ३२ लाख ५६ हजार थियो ।

मध्य प्रदेशका आरटीआई कार्यकर्ता चन्द्र शेखर गौरले दायर गरेको आरटीआई आवेदनको जवाफमा, रेलवेले गलत टिकटमा वा बिना टिकट यात्रा गर्ने मानिसहरूलाई जरिवानाको रकमको विवरण पनि दिएको छ।

वर्ष २०२०-२१ मा यात्रुहरूमाथि जरिवानाबाट रेलवेको आम्दानी १५२ करोड रुपैयाँ थियो, जुन २०२१-२२ मा बढेर १५७४.७३ करोड रुपैयाँ पुगेको छ।

२०२२-२३ मा, रेलवेले जरिवानाबाट २२६०.०५ करोड रुपैयाँ कमाएको थियो। सन् २०२२-२३ मा रेलवेले जरिवाना तिर्नेको संख्या विश्वका धेरै साना देशको जनसंख्याभन्दा बढी छ।

रेलवे नियम अनुसार कुनै यात्रु बिना टिकट यात्रा गरेको पाइएमा टिकटको वास्तविक मूल्यसहित कम्तिमा २५० रुपैयाँ जरिवाना हुन्छ ।

यदि यात्रुले आफूसँग पैसा नभएको बताउँछ वा जरिवाना तिर्न इन्कार गर्छ भने, उसलाई रेलवे ऐनको धारा १३७ अन्तर्गत रेलवे सुरक्षा बललाई सुम्पिन्छ।

त्यसपछि यस्तो यात्रुलाई म्याजिस्ट्रेट समक्ष पेश गरिन्छ जहाँ उसलाई एक हजार रुपैयाँ जरिवाना गर्न सकिन्छ।

त्यस्तो अवस्थामा पनि दोषी ठहर भएका व्यक्तिले जरिवाना तिर्न इन्कार गरेमा ६ महिनासम्म कैद सजाय हुनसक्छ ।