काठमाडौँ।  पद्मश्री साहित्य पुरस्कार २०७९ का लागि पहिलो चरणमा उत्कृष्ट १५ पुस्तकहरुको विस्तारित सूची सार्वजनिक गरेको छ। खेमलाल हरिकला लामिछाने प्रतिष्ठानले शुक्रबार पद्मश्री साहित्य पुरस्कार-२०७९ का लागि उत्कृष्ट १५ पुस्तकको सूची सार्वजनिक गरेको हो ।

चयन प्रक्रियाको पहिलो चरणमा प्रतिष्ठानमा प्राप्त भएका पुस्तकहरूमध्येबाट १५ पुस्तकलाई उत्कृष्ट विस्तारित सूची (लङ लिस्ट) सार्वजनिक गर्ने, दोस्रो चरणमा विस्तारित सूचीमध्येबाट उत्कृष्ट संक्षिप्त सूची (शर्ट लिस्ट) चयन गर्ने र अन्तिम चरणमा पुरस्कृत पुस्तक घोषणा गरिने जीवा लामिछाने बताए ।

उनका अनुसार अघिल्लो वर्ष प्रकाशित पुस्तकहरूमध्ये प्रतिष्ठानमा १८० पुस्तकमध्येबाट पहिलो चरणको उत्कृष्ट विस्तारित सूचीका लागि निर्णायक समितिले प्रतिष्ठानलाई निम्न १५ पुस्तकको उपलब्ध गराएको हो ।

विस्तारित पुस्तकको सूचीमा जानुका खतिवडाको आतोओडा, सुबिन भट्टराईको इजोरिया , विवेक ओझाको ऐँठन, गोपी सापकोटाको चिसो बाफ, प्रगति राईको  थाङ्ग्रा, रमेश क्षितिजको पर्वतपर्वतमा बटुवा घाम, सुरेश प्राञ्जलीको पानीघट्ट, शैलेन्द्र अधिकारीको ब्रम्हास्त्र, रामलाल जोशीको बाआमा, प्रोल्लास सिन्धुलीयको भग्न भैरव, डा. देवीप्रसाद सुवेदीको मनु, प्रदीप रोदनको मफलर, हरिबोल काफ्लेको यशोधरा, डा. नवराज केसीको शून्यको मूल्य र अशोक थापाको सन्तापको धून चयन भएका छन्।

प्रतिष्ठानले २०६३ सालदेखि नेपाली साहित्यमा वर्षभरि प्रकाशित पुस्तकहरु मध्येबाट उत्कृष्ट पुस्तकलाई पद्मश्री साहित्य पुरस्कार प्रदान गर्दै आएको छ।