काठमाडौं । विगत साढे दुई महिनादेखि मणिपुरमा मेइती र कुकी समुदायबीच हिंसात्मक द्वन्द्वको बीचमा बुधबार मणिपुरमा दुई महिलामाथि यौन दुर्व्यवहारको डरलाग्दो भिडियो सार्वजनिक भएको छ ।

बिहीबार जब प्रधानमन्त्री नरेन्द्र मोदी संसदको मनसुन सत्र अघि मिडियासँग कुरा गर्न आएका थिए, उनले पनि मणिपुरको घटनाको उल्लेख गर्दै आफ्नो मन पीडाले भरिएको बताए।

प्रधानमन्त्री मोदीले देशको अपमान भइरहेको र दोषीलाई उन्मुक्ति नदिने बताएका छन् । मणिपुरमा जारी हिंसाबारे प्रधानमन्त्री मोदीले पहिलो पटक बोलेका हुन् । विपक्षीहरूले लामो समयदेखि प्रधानमन्त्री मोदीले मणिपुरको विषयमा नबोलेकोमा प्रश्न उठाउँदै आएका थिए।

यस भिडियोको पुष्टि गर्दै मणिपुर प्रहरीले यी महिलाहरू मे ४ मा मणिपुरको थौबल जिल्लामा यौन दुर्व्यवहारको सिकार भएको बताएको छ।

मणिपुर प्रहरीले भन्यो, ‘यो घटना मे ४ को हो । यसमा अपहरण, सामूहिक बलात्कार र हत्याको मुद्दा अज्ञात व्यक्ति विरुद्ध दर्ता गरिएको छ। यस विषयमा अनुसन्धान सुरु भएको छ । प्रहरीले दोषीलाई पक्राउ गर्न सक्दो प्रयास गरिरहेको छ ।’

मणिपुरका मुख्यमन्त्री बिरेन सिंहले दोषीलाई फाँसी दिने प्रयास गर्ने बताएका छन् । यस घटनामा एक जनालाई पक्राउ गरिएको मुख्यमन्त्रीले बताए ।

सर्वोच्च अदालतले पनि स्वतः संज्ञान लिएको छ र सम्पूर्ण मुद्दाको सुनुवाइ यही जुलाई २८ मा तोकेको छ । भिडियो सार्वजनिक भएसँगै यस विषयमा केन्द्रदेखि विपक्षी दलका प्रमुख नेतासम्मको कडा प्रतिक्रिया देखिएको छ ।

कांग्रेसलगायत अन्य विपक्षी दलहरूले यस विषयमा सत्तारुढ दल भाजपालाई घेरा हाल्ने प्रयास गरेका छन् ।

यसै क्रममा केन्द्रीय महिला तथा बाल विकास मन्त्री स्मृति इरानीले ट्वीटरमा लेखेकी छिन् कि उनले यस विषयमा राज्यका मुख्यमन्त्री एन बिरेन सिंहसँग कुरा गरिसकेकी छिन् र दोषीलाई पक्रन कुनै कसर बाँकी राखिने छैन।

अङ्ग्रेजी पत्रिका इन्डियन एक्सप्रेसमा प्रकाशित समाचारका अनुसार मेइती बहुल थौबल जिल्लामा मे ४ मा कुकी-जोमी समुदायका यी महिलामाथि यौन दुर्व्यवहार भएको थियो ।

तर, उनीहरु विरुद्ध भएको यौन उत्पीडनको मुद्दा काङ्गपोकपी जिल्लामा मे १८ मा दर्ता भएको थियो । त्यसपछि मुद्दा सम्बन्धित प्रहरी चौकीमा पठाइयो।

मणिपुर प्रहरीका उच्च अधिकारी एसपी के मेघचन्द्र सिंहले यस घटनाको बारेमा जारी गरेको प्रेस नोटमा भनेका छन् कि मणिपुर प्रहरीले अपराधीलाई पक्राउ गर्न सक्दो प्रयास गरिरहेको छ।

भिडियोमा देखिएकी एक महिलाको उमेर करिब २० वर्ष र अर्की महिलाको उमेर ४० वर्ष रहेको बताइएको छ ।

भिडियोमा दुईजना महिला मात्रै देखिन्छन् तर भीडले ५० वर्षीया महिलालाई पनि कपडा खोल्न बाध्य पारेको यी महिलाले आफ्नो उजुरीमा बताएका छन् ।

एफआईआरमा एक युवतीमाथि दिउँसो सामूहिक बलात्कार भएको पनि उल्लेख छ ।

थौबल जिल्लास्थित आफ्नो गाउँमा गत मे ३ मा आधुनिक हतियारसहित आठ सयदेखि एक हजार व्यक्तिले आक्रमण गरी गाउँमा आगजनी गरी लुटपाट गर्न थालेको पीडितले बताएका छन् ।

यस्तो अवस्थामा दुई महिला र युवती आफ्ना बाबु र भाइसँगै जंगलतर्फ दौडे ।

उजुरीका अनुसार प्रहरीले ती महिलालाई बचाउन पनि सफल भएको थियो । प्रहरीले ती व्यक्तिलाई प्रहरी चौकी लैजाँदै थियो तर प्रहरी चौकीभन्दा दुई किलोमिटर अगाडि भीडले रोकेको थियो ।

यसपछि आन्दोलनकारीले ती महिलालाई प्रहरीबाट खोसेका थिए र युवतीको बुवालाई घटनास्थलमै मारिएको थियो ।

एफआईआरका अनुसार तीन महिलालाई भीडको अगाडि नग्न हिंड्न बाध्य पारिएको थियो र युवतीलाई सार्वजनिक रूपमा सामूहिक बलात्कार गरेको आरोप छ। एफआईआरका अनुसार महिलाको १९ वर्षीय भाइले उनलाई बचाउन खोज्दा उनको पनि हत्या भएको थियो ।

आदिवासी जनजाति अगुवा मञ्चले यस विषयमा विज्ञप्ति जारी गर्दै यौन दुर्व्यवहार गर्नेले पीडितको परिचय खुल्ने भिडियो सार्वजनिक गर्ने निर्णय गरेर पीडितमाथि अत्याचार बढाएको बताएको छ ।

यसैबीच महिला सङ्गठनले यही विषयलाई लिएर विरोध र्‍याली निकाल्ने घोषणा गरेपछि प्रदेश सरकारले उपत्यकाका पाँच जिल्लामा अनिश्चितकालीन कर्फ्यू घोषणा गरेको छ ।

यी जिल्लाहरू इम्फाल पूर्व, इम्फाल पश्चिम, विष्णुपुर, काक्चिङ र थौबल हुन्।

अङ्ग्रेजी अखबार हिन्दूमा प्रकाशित समाचार अनुसार मणिपुरको वर्तमान अवस्थालाई ध्यानमा राख्दै सीआरपीएफले नागाल्याण्ड र असमका दुई उच्च अधिकारीलाई मणिपुरमा तैनाथ गरेको छ ।

यससँगै मणिपुरको काङ्पोकपी र जिराबम जिल्लामा दुईवटा रणनीतिक मुख्यालय स्थापना गर्ने निर्णय भएको छ। सीआरपीएफको पहिले नै इम्फालमा मुख्यालय छ।

हाल, राज्य पुलिससंग, सीआरपीएफको १२४ कम्पनीहरु र सेना को १८४ कोलम मणिपुरमा तैनाथ छन्।