काठमाडौं । युक्रेनमा शनिबार एक रुसी पत्रकारको मृत्यु र तीनजना घाइते भएपछि दुई देशबीच आरोप–प्रत्यारोप सुरु भएको छ ।

रुसी रक्षा मन्त्रालयले युक्रेनले क्लस्टर बम प्रयोग गरी गरेको आक्रमणमा पत्रकार मारिएको बताएको छ ।

अर्को घटनामा, जर्मन प्रसारक ड्यूचे वेलेले युक्रेन भित्रका आफ्ना एक पत्रकार रुसी आक्रमणमा घाइते भएको बताएको समाचार एजेन्सी रोयटर्सले बताएको छ। यस आक्रमणमा एक युक्रेनी सैनिकको पनि ज्यान गएको छ । पत्रकारको ज्यान अहिले खतरामुक्त छ ।

यही महिनामा युक्रेनले अमेरिकाबाट क्लस्टर बमको खेप प्राप्त गरेको थियो, त्यसपछि यो चर्चामा छ ।

क्लस्टर हतियारहरू अत्यन्त खतरनाक छन्। तिनीहरू विष्फोट नभइ लामो समयसम्म रहन्छन्। यसलाई नागरिकका लागि निकै खतरनाक मानिन्छ, त्यसैले विश्वका १०० भन्दा बढी देशमा यसलाई प्रतिबन्ध लगाइएको छ ।

यद्यपि समाचार एजेन्सी रोयटर्सले शनिबारको आक्रमणमा क्लस्टर हतियारको प्रयोग भएको कुरा अहिले नै पुष्टि गर्न नसकिने स्पष्ट पारेको छ। तर युक्रेन र रुस दुवैले युद्धको सुरुवातदेखि नै क्लस्टर बम प्रयोग गर्दै आएका छन्।

आक्रमणमा मारिएका रुसी पत्रकारको नाम रोस्टिस्लाभ झुराभलेभ रहेको छ । उनी सरकारी समाचार एजेन्सी रियाको युद्ध संवाददाताका रूपमा कार्यरत थिए । आक्रमणको बीचमा युक्रेनको जापोरोज्ये क्षेत्रबाट उनका तीन सहकर्मीलाई सुरक्षित रूपमा बाहिर निकालिएको छ।

रुसी विदेश मन्त्रालयकी प्रवक्ता मारिया जाखारोभाले आक्रमणको निन्दा गर्दै यसलाई युक्रेनको ‘आपराधिक आतंक’ भनेकी छन् । युक्रेनले यो हमला जानाजानी गरेको उनले बताइन्, यद्यपि आफूले प्रमाणित गर्ने कुनै प्रमाण भने नदिएको उनले बताए ।

जाखारोभाले भनिन्, “रुसी पत्रकार विरुद्धको क्रूर प्रतिशोधका लागि जिम्मेवार व्यक्तिहरूलाई कारबाही हुनुपर्छ। किभलाई क्लस्टर हतियार आपूर्ति गर्नेहरूले पनि यो जिम्मेवारी वहन गर्नुपर्छ।”

युक्रेनले यस विषयमा अहिलेसम्म कुनै प्रतिक्रिया दिएको छैन।