काठमाडौं । पछिल्लो केही दिनदेखि भारत र क्यानडाबीच जारी कूटनीतिक तनावलाई लिएर अहिले छिमेकी मुलुक बंगलादेशबाट एउटा महत्वपूर्ण वक्तव्य आएको छ ।

द हिन्दूमा प्रकाशित समाचार अनुसार बंगलादेशका विदेशमन्त्री एके अब्दुल मोमेनले क्यानडा “हत्याराहरू” को आश्रयस्थल बनेको बताएका छन्।

इण्डिया टुडे टिभी नेटवर्कलाई दिएको अन्तर्वार्तामा अब्दुल मोमेनले बंगलादेशका संस्थापक तथा पूर्व राष्ट्रपति शेख मुजिबुर रहमान र उनको परिवारका अधिकांश सदस्यको हत्यामा मुख्य दोषी एसएचएमबी रहेको बताए । नूर चौधरी सन् १९९६ देखि क्यानडामा बस्दै आएपनि उनको सुपुर्दगी मुद्दामा क्यानडाले सहयोग गरिरहेको छैन ।

उनले भने, “क्यानाडाले हत्यारालाई आफ्नो देशमा आश्रय दिनु हुँदैन। हत्याराहरू क्यानडामा आएर त्यहाँ शरण लिन्छन् र राम्रो जीवन बिताउँछन्, जबकि उनीहरूले मारेका परिवारहरू कठिनाइमा बाँच्छन्।”

बंगलादेशको अदालतले मुजिबुर रहमानको हत्या अभियोगमा नूर चौधरीलाई मृत्युदण्डको सजाय सुनाएको छ । तर क्यानडाले नूर चौधरीलाई राजनीतिक शरण दिएको छ र अहिलेसम्म बंगलादेशको सुपुर्दगीको प्रयासलाई अस्वीकार गर्दै आएको छ ।

मुजिबुर रहमानको १४ अगस्ट १९७५ मा हत्या भएको थियो । धेरै प्रत्यक्षदर्शीहरूले नूर चौधरीले मुजिबुर रहमानमाथि गोली चलाएको देखेको बताएका छन्।

प्रत्येक वर्ष, बंगलादेशले १५ अगस्टलाई राष्ट्रिय शोक दिवसको रूपमा मनाउँछ र मुजिबुर रहमानको योगदानलाई सम्झन्छ। उनकी छोरी शेख हसिना बंगलादेशकी वर्तमान प्रधानमन्त्री हुन् ।

द हिन्दूका अनुसार यस हत्याकाण्डका अर्का अभियुक्त राशिद चौधरीलाई पनि मृत्युदण्ड दिइएको छ । उनी सन् १९९० देखि अमेरिकामा छन् ।

अब्दुल मोमेनले बंगलादेशका मोस्ट वान्टेड अपराधीहरु अरु कुनै देशमा रहेकाले सजायबाट बच्न लागेको बताए ।

उनले भने, “हाम्रो न्यायपालिका स्वतन्त्र र सरकारी हस्तक्षेपभन्दा बाहिर छ। नूर चौधरी र रशिद चौधरी बंगलादेश आए भने राष्ट्रपतिसँग माफी माग्न सक्छन्।”

बंगलादेशमा मुजिबुर रहमानको हत्यापछि बनेको सरकारले संविधान संशोधन गरी उनका हत्यारालाई गिरफ्तारीबाट राहत दिएको थियो । मुद्दाका दुवै अभियुक्तले करिब दुई दशकसम्म कूटनीतिक नियोगमा बंगलादेशको प्रतिनिधित्व गरेका थिए।

सन् १९९६ मा शेख हसिना बहुमतले विजयी भएर बंगलादेशको प्रधानमन्त्री बनेपछि र संविधान संशोधन गरेर हत्यारालाई सुरक्षा दिने विकल्प हटाइयो ।

त्यसपछि अदालतले नूर चौधरी र रसिद चौधरीलाई मृत्युदण्डको सजाय सुनाएको थियो । बंगलादेशको सर्वोच्च अदालतले सन् २००९ मा यो निर्णयलाई अनुमोदन गरेको थियो।

यसअघि श्रीलंकाका विदेशमन्त्री अली साबरीले लिबरेशन टाइगर्स अफ तमिल इलमसँग सम्बन्धित तत्वहरू क्यानडामा रहेको बताएका थिए जसको श्रीलंकाले विरोध गर्दै आएको छ ।

उनले भनेका थिए, “केही आतंकवादीले क्यानडामा सुरक्षित आश्रय पाउँछन्। क्यानडाका प्रधानमन्त्रीले अहिले खुलेर आरोप लगाइरहेका छन् तर उनीसँग यसको समर्थन गर्ने कुनै प्रमाण छैन।”

“उनले श्रीलंकासँग पनि त्यसै गरे। उनले श्रीलंकामा नरसंहार भएको थियो भने । यो सरासर झूट थियो। सबैलाई थाहा छ, श्रीलंकामा कहिल्यै नरसंहार भएको थिएन।”

भारतले पनि क्यानडामा खालिस्तान समर्थकहरूको समूह सक्रिय रहेको दाबी गरेको छ ।

भारतीय विदेशमन्त्री एस. जयशंकरले क्यानडामा पृथकतावादी शक्तिहरूसँग सम्बन्धित संगठित अपराधका धेरै घटनाहरू देखिएको बताएका छन्।