काठमाडौं । समाचार एजेन्सी पीटीआईको रिपोर्ट अनुसार भारतले दुई महिनाको अवरोधपछि क्यानाडाली नागरिकहरूको लागि ई-भिसा सेवा पुनर्स्थापित गरेको छ।

गत सेप्टेम्बरमा क्यानाडाका प्रधानमन्त्री जस्टिन ट्रुडोले १८ जुनमा ब्रिटिश कोलम्बियामा खालिस्तान समर्थक हरदीप सिंह निज्जरको हत्यामा भारतीय एजेन्टहरू संलग्न रहेको आरोप लगाएका थिए।

यसपछि भारत र क्यानडाबीच तनाव बढेको छ । भारतले ट्रुडोको आरोपलाई आधारहीन भन्दै अस्वीकार गरेको थियो ।

केही दिनपछि नयाँ दिल्लीले क्यानाडाली नागरिकहरूको लागि भिसा अस्थायी रूपमा बन्द गर्ने घोषणा गर्‍यो र क्यानडालाई दिल्लीमा आफ्ना कूटनीतिज्ञहरूको संख्या घटाउन भन्यो।

भारतले क्यानडालाई त्यहाँबाट सञ्चालित अतिवादी र भारत विरोधी तत्वहरू विरुद्ध कडा कारबाही गर्न भनेको थियो। निज्जरलाई सन् २०२० मा भारतले अतिवादी घोषणा गरेको थियो ।

क्यानडास्थित भारतीय दूतावासले धेरै प्रकारका भिसाहरू जारी गर्दछ। जसमा प्रवेश भिसा, व्यापार भिसा, पर्यटक भिसा, रोजगार भिसा, मेडिकल भिसा, फिल्म भिसा, विद्यार्थी भिसा र सम्मेलन भिसा पर्छन्।

गत महिना मात्र भारतले प्रवेश भिसा, व्यापार भिसा, मेडिकल भिसा र सम्मेलन भिसा पुनर्स्थापित गरेको थियो।