काठमाडौं । अमेरिकामा सन् २०२० मा अश्वेत नागरिक जर्ज फ्लोयडको मृत्यु प्रकरणमा जेल सजाय काटिरहेका पूर्व प्रहरी अधिकारी डेरेक चौभिन एरिजोनाको जेलमा चक्कु प्रहारबाट घाइते भएका छन् ।

अमेरिकी मिडियाका अनुसार यस हमलामा चौभिन गम्भीर घाइते भएका छन् ।

कारागार ब्यूरोको विज्ञप्ति अनुसार चौभिनलाई स्थानीय समय अनुसार शुक्रबार बिहान १२ः३० बजे टक्सनस्थित संघीय कारागारमा एक कैदीले आक्रमण गरेका थिए ।

यद्यपि आक्रमण गर्ने कैदीको नाम भने खुलाइएको छैन ।

२०२१ मा एक अमेरिकी अदालतले २०२० मा अफ्रिकी-अमेरिकी जर्ज फ्लोयडको मृत्युको मामिलामा पूर्व पुलिस अफिसर डेरेक चौभिनलाई हत्याको दोषी ठहराएको थियो।

यसका लागि उनलाई २२ वर्ष ६ महिनाको जेल सजाय सुनाइएको थियो ।

आफ्नो फैसला सुनाउँदै न्यायाधीशले पूर्व पुलिस अफिसर डेरेक चौभिनलाई ‘आफ्नो पद र अधिकारको दुरुपयोग’ र ‘जर्ज फ्लोयडसँगको क्रूर व्यवहार’ लाई ध्यानमा राखेर सजाय तोकिएको बताएका थिए।

हाल, ४७ वर्षीय डेरेक चौभिनलाई सन् २०२० को मे महिनामा मिनियापोलिसमा नौ मिनेटसम्म निहत्था र कालो मानिस जर्ज फ्लोइडको घाँटी घुँडाले थिचेको आरोप लागेको थियो।

केही मिनेटपछि उनको मृत्यु भयो । यो घटनाको भिडियो विश्वभर भाइरल भएपछि यो विषय चर्चामा आएको हो ।

यो भिडियो सार्वजनिक भएपछि अमेरिकासहित विश्वभर रंगभेद र प्रहरीको खराब व्यवहारको विरुद्धमा व्यापक विरोध भएको थियो ।