काठमाडौं । अखिल नेपाल राष्ट्रिय स्वतन्त्र विद्यार्थी युनियनले एनसेल प्रकरणको उच्चस्तरीय संसदीय छानविन गर्न माग गरेको छ ।

बिहिबार सिंहदरबारमा सभामुख देवराज घिमिरेलाई ज्ञापनपत्र बुझाउदै अखिलले एनसेलको गतिविधि देशहित विपरित रहेको भन्दै प्रतिनिधिसभा अन्तर्गत उच्चस्तरीय संसदीय छानविन समिति वा विशेष समितिमार्फत छानविन गरि सत्यतथ्य पत्ता लगाई समस्या समाधान गर्न माग गरेको हो । अखिलले एनसेल शेयर खरिद बिक्रि प्रकरण आफैमा अपारदर्शी तथा अविश्वसनीय रहेको, पूँजीगत लाभ कर छली तथा नेपाल सरकारलाई स्वामित्व हस्तान्तरणमा आलटाल गर्न उदेश्य राखेको जनाएको छ ।

अखिलको ज्ञापन पत्र बुझ्दै सभामुख घिमिरेले एनसेलका विषयमा बाहिर आएका विषयहेर्दा छानविन गर्नुपर्ने आवश्यकता देखिएको बताए । संसदीय समितिहरुले पनि यस विषयमा चासो दिईरहेको र यसमा देखिएको विवादलाई निष्कर्षमा पुराउनुपर्ने माग सकारात्मक नै रहेको उनले बताए ।

उनले एनसेलको भौतिक क्षति नपुराउने गरि दवावका कार्यक्रम गर्न सुझाव दिए । अखिलले यस विषयमा सत्यतथ्य छानविनका लागि सरकारलाई दवाव सिर्जना गर्न विरोध लगाएतका कार्यक्रमलाई निरन्तरता दिने कार्यवहाक अध्यक्ष गोविन्द गिरीले बताए ।