काठमाडौं । यमनका इरान समर्थित हुथी विद्रोहीले शनिबार इजरायलको बन्दरगाहतर्फ जाने कुनै पनि जहाजलाई निशाना बनाउने धम्की दिएका छन् ।

हुथी विद्रोहीहरूले जबसम्म गाजामा औषधि र राहत सामग्रीको प्रवाहलाई रोकिन्छ तबसम्म इजरायल जाने जहाजहरूलाई लाल सागरमा निशाना बनाइने बताएका छन्।

गाजामा दुई महिनाअघि इजरायल र प्यालेस्टाइनबीचको द्वन्द्व सुरु भएदेखि यमनका विद्रोहीहरूले लाल सागरमा इजरायलसँग सम्बन्धित धेरै जहाजहरूलाई निशाना बनाएका छन्।

सामाजिक सञ्जालमा पोष्ट गरिएको एक विज्ञप्तिमा यमनका हुथी विद्रोहीहरूले गाजामा मानवीय सहायता पुग्न नदिइएमा इजरायलतर्फ जाने जहाजहरू अवरुद्ध गर्ने बताएका छन्।

विद्रोहीहरूले भनेका छन् ‘इजरायलका लागि जाने जहाजहरू चाहे जुनसुकै देशका भए पनि विद्रोहीहरूको मिसाइलको वैध लक्ष्य हुनेछ।’

हालैका दिनहरूमा हुथी विद्रोहीहरूले धेरै जहाजहरूलाई निशाना बनाएका छन् र दावी गरेका छन् कि तिनीहरूको इजरायलसँग सीधा सम्बन्ध छ। यद्यपि, यो नयाँ खतरामा सबै राष्ट्रका जहाजहरू समावेश गरिएका छन्।

हमासले हुथी विद्रोहीको यो भनाइलाई ‘साहसी’ भन्दै स्वागत गरेको छ ।

इजरायलले ‘नौसेना घेराबन्दी’ स्वीकार नगर्ने बताएको छ । इजरायलका प्रधानमन्त्री बेन्जामिन नेतान्याहुले अमेरिकी राष्ट्रपति जो बाइडेन र युरोपेली संघका नेताहरुलाई यो अवस्थासँग जुध्न अपिल गरेका छन् ।

यसैबीच, आइतवार फ्रान्सेली सेनाले उसको एक फ्रिगेटले यमनबाट प्रक्षेपण गरिएका दुई ड्रोनहरू खसालेको बताएको छ जुन लाल सागरमा यसतर्फ बढिरहेका थिए।

फ्रान्सेली सेनाले जारी गरेको विज्ञप्तिमा शनिबार राति यी ड्रोनलाई खसालिएको बताइएको छ ।

इजरायलका राष्ट्रिय सुरक्षा सल्लाहकार जाची हानेग्बीले यदि विश्वले यो अवस्थासँग जुध्न नसके इजरायलले नै यो नौसैनिक घेराबन्दी अन्त्य गर्ने बताएका छन् ।