काठमाडौं । मकवानपुर प्रहरीले दुई नाल भरुवा बन्दुकसहित एक जनालाई नियन्त्रणमा लिएको छ।

मंगलबार दिउँसो २ बजेको समयमा विशेष सूचनाका आधारमा जिल्ला प्रहरी कार्यालय मकवानपुर र ईलाका प्रहरी कार्यालय ठिंगनबाट प्रहरी निरीक्षकको कमाण्डमा खटिएको प्रहरी टोलीले बन्दुकसहित एक जनालाई पक्राउ गरेको हो।

पक्राउ पर्नेमा मकवानपुर बकैया गाउँपालिका वडा नम्बर ११ बस्ने ३७ वर्षीय सोमबहादुर नेसुर रहेका छन्। उनले आफ्नो घरमा लुकाई छिपाई राखेको अवस्थामा २ नाल भरुवा बन्दुक, विष्फोटक पदार्थ बारुद जस्तो देखिने कालो धुलो पदार्थ अनुमानित १०० ग्राम र प्लास्टिकको बट्टामा फलामको बेरिङ जस्तो स–सानो टुक्राहरु फेला परेको हो।

उक्त हातहतियार तथा खरखजनासहित नेसुरलाई नियन्त्रणमा लिइ जिल्ला जिल्ला अदालत मकवानपुरबाट ८ दिनको म्याद अनुमति लिइ थप अनुसन्धान कार्य भइरहेको प्रहरीले जनाएको छ।