काठमाडौं । इजरायल-हमास युद्धको बीचमा इरानले इजरायली सैनिकहरूलाई हनीट्र्याप गर्न र गुप्तचर सूचना सङ्कलन गर्न केटीहरू प्रयोग गरेको खुलासा भएको छ।

लन्डनस्थित न्यूज आउटलेट इरान इन्टरनेशनलले एक रिपोर्टमा इरानले उत्तरी सहर मशादमा हिब्रू भाषा बोल्ने महिलाको समूहलाई यस कामका लागि खटाएको गरेको दाबी गरेको छ। यी महिला एजेन्टहरूले इजरायली सैनिकहरूलाई आपत्तिजनक तस्बिरहरू पठाएर हनीट्र्याप गर्ने प्रयास गरेका छन् ।

रिपोर्टका अनुसार इरानी महिलाहरूलाई इरानको रिभोलुसनरी गार्ड्स कोरले तालिम दिएको थियो। उनीहरूलाई हिब्रू भाषामा राम्रो तालिम दिइएको छ र सामाजिक सञ्जालमार्फत इजरायली सैनिकहरूसँग कसरी सम्पर्क गर्ने र उनीहरूबाट जानकारी प्राप्त गर्ने तरिका बताईएको छ। उनी सैनिकलाई फसाउन अश्लिल भिडियो र तस्विर पठाउने गर्दथिन् ।

महिलाहरूले सैनिकहरूलाई फसाउन नक्कली नाम र प्रोफाइलहरू प्रयोग गरे तर पठाइएका तस्विरहरू र भिडियोहरू बिल्कुल वास्तविक थिए। कतिपय तस्विर र भिडियोमा महिलाले क्याप लगाएको र भारी मेकअप गरेको देखियो भने कतिपयमा अर्धनग्न लुगा लगाएको देखियो ।

लगभग 22 विभिन्न प्रोफाइलहरू कथित रूपमा सिर्जना गरिएको थियो। तीमध्ये दुई महिलाको पहिचान भइसकेको छ । दुबै महिला मशाद सहरका हुन्, जसको नाम समीरा बागबानी तर्सिजी र हनियाह गफारियन हो।

यो खुलासा गर्ने समाचार संस्थाले हनीट्र्यापबाट महिलाले प्राप्त गरेको जानकारी हमासलाई दिएको बताएको छ । हमासले पनि इजरायली सैनिकहरूको जानकारी लिन हनीट्र्यापको सहारा लिइरहेको छ।

यस्तो हनिट्र्याप पर्दाफास भएको यो पहिलो पटक भने होइन, विगतमा पनि यस्ता खबरहरु आइरहेका छन् । गत महिना मात्रै इजरायली सेना आईडीएफले हमासले हनीट्र्यापमार्फत आफ्ना सैनिकहरूबाट जानकारी लिइरहेको दाबी गरेको थियो। आइडीएफले यससँग सम्बन्धित सामाजिक सञ्जाल प्रोफाइलहरू पर्दाफास गरेको थियो।

आईडीएफले हनिट्र्याप इरानले नेतृत्व गरिरहेको र सैनिकहरूलाई प्रलोभनमा पार्न महिलाहरूको भ्वाइस रेकर्डिङ र भिडियो कलहरू प्रयोग भइरहेको बताएको थियो। इजरायलले यी प्रोफाइलहरू ब्लक गर्न सामाजिक सञ्जाल साइटहरूसँग सम्पर्कमा रहेको बताएको थियो।

गाजा नियन्त्रण गर्ने हमास लडाकुहरूले अक्टोबर ७ मा अचानक इजरायलमा आक्रमण गरे, जसमा १२०० भन्दा बढी व्यक्तिको मृत्यु भयो र सयौंलाई बन्धक बनाइयो। त्यसको जवाफमा इजरायलले गाजामा तीव्र आक्रमण गरेको थियो।

दुई महिनाभन्दा बढी समयदेखि जारी यो लडाइँमा गाजा तहसनहस भएको छ र अहिलेसम्म करिब १९ हजार प्यालेस्टिनी मारिएका छन् । मृत्यु हुनेमा अधिकांश महिला र बालबालिका रहेका छन् ।