काठमाडौं । अक्टोबर ७ मा हमासको हमलापछि इजरायलले गाजामा आक्रमण सुरु गरेको थियो । त्यसयता गाजामा कम्तिमा २० हजार प्यालेस्टाइनी मारिएको बताइएको छ।

गाजामा हमासद्वारा सञ्चालित स्वास्थ्य मन्त्रालयको तथ्याङ्कले देखाउँछ कि त्यहाँ द्वन्द्व सुरु भएदेखि (एक साता लामो युद्धविराम बाहेक) त्यहाँ दैनिक औसत ३०० जनाको मृत्यु भएको छ।

विश्व स्वास्थ्य संगठन (डब्लुएचओ) का क्षेत्रीय आपतकालिन निर्देशक रिचर्ड ब्रेननले मृत्यु हुनेको यो संख्यालाई विश्वासयोग्य ठान्छन्।

बीबीसी भेरिफाइ ले पनि डाटालाई राम्रोसँग हेरेको छ। कुनै पनि रणभूमिमा मृतकको गणना गर्नु चुनौतीपूर्ण कार्य हो।

तर, गाजाका डाक्टरहरूले मृत्यु हुनेको संख्या धेरै हुन सक्ने बताएका छन् । त्यो किनभने यो तथ्याङ्कमा बम विष्फोटबाट ध्वस्त भएका वा अस्पतालमा नपुगेका भवनहरूको भग्नावशेषमुनि गाडिएका शवहरू समावेश छैनन्।

विश्वभरका युद्धहरूमा मारिएका व्यक्तिहरूको संख्या जाँच गर्ने विशेषज्ञ प्रोफेसर माइकल स्प्यागाटले यसबारे कुरा गरे।

उनले २००३ इराक युद्ध, कोलम्बियाई गृह द्वन्द्व, प्रजातान्त्रिक गणतन्त्र कंगोको युद्ध, र इजरायल र गाजा बीचको अघिल्लो द्वन्द्वमा हताहतको तथ्याङ्कमा पनि काम गरे।

उनका अनुसार यस युद्धमा मृत्युदर ‘असाधारण उच्च’ रहेको छ । उनले भने, “सन् २००८ देखि गाजामा भएका धेरै युद्धहरूको तुलनामा यस युद्धमा मारिनेको संख्या अभूतपूर्व हो।”