काठमाडौं । पूर्व मोडल दिव्या पाहुजाको शव हरियाणाको फतेहाबाद जिल्लाको नहरबाट फेला परेको छ । समाचार एजेन्सी पीटीआईको रिपोर्ट अनुसार उनको केही दिन अघि गुरुग्रामको एक होटलमा गोली हानी हत्या गरिएको थियो ।

अभियुक्त बलराज गिलले दिएको जानकारीका आधारमा दिव्या पाहुजाको शव फेला परेको प्रहरी अधिकारीको दाबी छ ।

बलराज गिल बिहीबार कोलकाता एयरपोर्टबाट पक्राउ परेका थिए । बलराज गिलमाथि दिव्याको शवको विसर्जन गरेको आरोप छ ।

दिव्या पाहुजालाई पाँच जनाले होटल सिटी प्वाइन्टमा लगेर कोठा नम्बर १११ मा टाउकोमा गोली हानेको प्रहरीले जनाएको छ ।

प्रहरीका अनुसार दिव्या पाहुजाले सो होटलका मालिकलाई ब्ल्याकमेल गरिरहेकी थिइन् ।

गुरुग्रामका सहायक प्रहरी आयुक्त (अपराध) वरुण कुमार दहियाले दिव्याको शव फतेहाबादको टोहानास्थित भाक्रा नहरको सहायक नहरबाट फेला पारेको बताए। शव पोस्टमार्टमका लागि पठाइनेछ ।

उनले होटल सिटी प्वाइन्टको सीसीटीभीमा अभियुक्त देख्न सकिने बताए जसमा होटल सञ्चालक पनि छन् ।

सीसीटीभी फुटेजमा होटलको लबीबाट कथित रूपमा सेतो चादरमा बेरेर दिव्या पाहुजाको शव लिएर गएको केही व्यक्तिहरू देखिन्छन्। यी व्यक्तिहरूले शवलाई कारको डिक्कीमा राखेर त्यहाँबाट लैजाँदै गरेको देखिन्छ ।

पुलिसका अनुसार होटल मालिकले पछि कारको साँचो बलराज गिललाई दिएका थिए र कार पछि पटियाला, पञ्जाबको बस स्ट्यान्डमा बेवारिसे अवस्थामा फेला परेको थियो।

एसीपी (अपराध) वरुणकुमार दहियाका अनुसार बलराज गिलका सहयोगी अझै पक्राउ परेका छैनन् । यस घटनामा प्रहरीले यसअघि चार जनालाई पक्राउ गरेको थियो ।