काठमाडौं। प्रधानमन्त्री कप राष्ट्रिय एकदिवसीय क्रिकेट अन्तर्गत विभागीय टिम नेपाल पुलिसलाई कोशी प्रदेशले १६७ रनको लक्ष्य प्रस्तुत गरेको छ।

कीर्तिपूरस्थित त्रिवि मैदानमा पहिला ब्याटिङ गरेको कोशीले ४८.२ ओभरमा १६६ रन बनाउँदै अलआउट भयो। कोशीका लागि सुजन थपलियाले शानदार शतकीय पारी खेले । टिमका लागि वान म्यान आर्मीको भूमिकामा रहँदै सुजनले शतक प्रहार गरेका हुन्।

उनले १२६ बलको सामना गर्दै ८ छक्का र ६ चौका हिर्काउँदै १०५ रनकबो शानदार पारी खेले। ६४ रन बनाउँदा ७ विकेट गुमाएको अवस्थामा मैदान छिरेका सुजनले अभ्यास तिमिल्सिनासँग मिलेर शानदार प्रदर्शन गरेका हुन् । अभ्यास २३ रन बनाएर आउट भए।

सुजनको शतक यस संस्करणको पीएम कपको चौथो शतक हो। यसअघि रसिद खान, सन्दीप जोरा र विनोद भण्डारीले शतक प्रहार गरेका थिए । बलिङतर्फ पुलिसका करण केसीले तीन तथा सुनिल धमला र ललित राजवंशीले २ विकेट लिए।