काठमाडौं । स्विट्जरल्याण्डको डाभोसमा जारी विश्व आर्थिक मञ्चको बैठकमा इरानका विदेशमन्त्री हुसेन अमिर अब्दुल्लाहियानले पाकिस्तानको बलुचिस्तानमा भएको आक्रमणबारे आफ्नो धारणा व्यक्त गरेका छन् ।

उनले इरानको मिसाइल र ड्रोन आक्रमणको निशानामा कुनै पनि पाकिस्तानी नागरिक नभएको दाबी गरेका छन् ।

इरानी विदेशमन्त्रीका अनुसार उनीहरुको निशाना इरानी चरमपन्थी समूह ‘जैश अल-अदल’ हो, जसका लडाकुहरूले पाकिस्तानको बलुचिस्तान प्रान्तमा शरण लिएका छन्।

उनले अगाडि भने – हामीले पाकिस्तानका धेरै अधिकारी र सुरक्षा बलहरूसँग पटक पटक कुरा गरेका छौं। इरानमा उनीहरूले हाम्रा सुरक्षा बलका सैनिकहरूलाई मारेका छन्। सोही अनुसार हामीले प्रतिक्रिया दिएका छौं ।

हामीले पाकिस्तानी भूमिमा रहेका इरानी आतंकवादीहरूलाई मात्रै निशाना बनाएका छौं।

यसअघि मैले मेरा समकक्षी पाकिस्तानका माननीय विदेशमन्त्रीसँग कुरा गरेँ र उहाँलाई हामी पाकिस्तान र इराकको सार्वभौमसत्ता र अखण्डताको सम्मान गर्छौं भनी आश्वासन दिएँ।

तर हामी हाम्रो राष्ट्रिय सुरक्षासँग सम्झौता वा खेलवाड हुन दिँदैनौं र राष्ट्रिय हितको कुरा आउँदा हामीलाई कुनै हिचकिचाहट छैन।

इरानले पाकिस्तानको बलुचिस्तान प्रान्तमा रहेको चरमपन्थी संगठन जैश अल अदलको अखडामा मिसाइल प्रहार गरेको हो । यस आक्रमणमा दुई बालबालिकाको मृत्यु भएको पाकिस्तानले जनाएको छ ।

पाकिस्तानले यसलाई अस्वीकार्य अप्रत्याशित कार्य भनेको छ र इरानबाट आफ्ना राजदूत फिर्ता बोलाएको छ। पाकिस्तानले हाल बिदामा रहेका इस्लामावादका लागि इरानका राजदूतलाई नफर्काउन पनि भनेको छ ।