काठमाडौं । अमेरिकाले यमनमा हुथी विद्रोहीको स्थानमा फेरि आक्रमण गरेको दाबी गरेको छ । अमेरिकाको दाबीअनुसार यी आक्रमणहरू गर्न आवश्यक थियो अन्यथा हुथी विद्रोहीहरूले मिसाइलहरू प्रहार गर्ने तयारी गरिरहेका थिए।

अमेरिकी सेनाले भनेअनुसार बुधबार उसले हुथी विद्रोहीहरूका १४ लोडेड मिसाइलहरूलाई लक्षित गरेको थियो । यी मिसाइलहरू प्रक्षेपण गर्न तयार थिए।

युएस सेन्ट्रल कमाण्डले एक्स (पहिले ट्विटर) मा पोष्ट गरेको छ – क्षेप्यास्त्रहरू व्यापारी जहाजहरू र यस क्षेत्रबाट गुज्रिरहेका अमेरिकी नौसेनाका जहाजहरूका लागि खतरा थिए।

अमेरिकी सेनाले लेखेको छ, “यी क्षेप्यास्त्रहरूले यस क्षेत्रमा अवस्थित व्यापारी जहाज र अमेरिकी नौसैनिक जहाजहरूका लागि खतरा खडा गरेका थिए र यी मिसाइलहरू जुनसुकै बेला प्रहार गर्न सकिन्थ्यो। यस कारणले गर्दा अमेरिकी सैनिकहरूले आत्मरक्षाको अधिकार र जिम्मेवारीलाई पालना गर्नुपरेको थियो।”

“हामीले उठाएका यी स्ट्राइकहरू र अन्य कदमहरूले लाल सागर, बाब अल-मन्डब र एडेनको खाडीमा अन्तर्राष्ट्रिय र व्यावसायिक ढुवानी गतिविधिमा आक्रमण गर्ने हुथी विद्रोहीहरूको क्षमतालाई कम गर्नेछ।”

यसअघि अमेरिकाले लाल सागरमा हुथी विद्रोहीले अमेरिकी स्वामित्वको जहाजमा आक्रमण गरेको दाबी गरेको थियो ।

यसअघि पनि अमेरिकी र बेलायती नौसेनाले हुथी विद्रोहीको स्थानमा आक्रमण गरेका थिए । गत हप्ता अमेरिकाले हवाई र समुद्री आक्रमणमा हुथी विद्रोहीको १६ स्थानलाई निशाना बनाइएको बताएको थियो।

यमनको ठूलो भाग नियन्त्रणमा लिएका हुथी विद्रोहीहरूले नोभेम्बरदेखि लाल सागरमा रहेका जहाजहरूमा आक्रमण गर्दै आएका छन्। उनीहरूले गाजा र प्यालेस्टिनीहरूको समर्थनमा इजरायल जाने र आउने जहाजहरूलाई निशाना बनाएको बताएका छन्।

तर, अन्य जहाज पनि उनीहरुको आक्रमणमा परेका छन्, जसका कारण धेरै ठूला तेल तथा ढुवानी कम्पनीहरूले यो क्षेत्र छोडेर अन्य समुद्री मार्ग प्रयोग गर्न थालेका छन् ।

इरानले हुथी विद्रोहीलाई आर्थिक र सैन्य सहयोग मात्रै नभई कारबाही गर्न लगाएको आरोप लगाइएको छ।

हालै अमेरिकाले संयुक्त राष्ट्रसंघमा लाल सागरमा हुथी विद्रोहीले गरेको आक्रमणमा इरानको हात रहेको बताएको थियो । इरानले यी आरोप झुटो भएको बताएको छ ।

हुथी विद्रोहीहरूले आफूलाई इरानको नेतृत्वमा रहेको ‘प्रतिरोधको धुरी’ का सदस्य भन्छन्।