काठमाडौं । पाकिस्तान पिपुल्स पार्टी (पीपीपी) का प्रमुख बिलावल भुट्टो जरदारीले अर्को महिना हुने आम चुनावमा आफू देशमा सत्तामा आएपछि इमरान खानको पाकिस्तान तहरीक-ए-इन्साफ पार्टीका १० हजार भन्दा बढी जेलमा परेका कार्यकर्ताहरूलाई रिहा गर्ने संकेत दिएका छन्।

आइतवार लाहोरमा एक ठूलो र्‍यालीलाई सम्बोधन गर्दै बिलावलले पीटीआई कार्यकर्ताहरूलाई फेब्रुअरी ८ को चुनावमा आफूलाई समर्थन गर्न र बदलामा आफूले प्रतिशोधको राजनीति अन्त्य गर्ने र जेलमा परेका सबै राजनीतिक कार्यकर्ताहरूलाई रिहा गर्ने अफर दिए ।

“शरीफको पीएमएल-एनले पीटीआईबाट बदला लिइरहेको छ। म पीटीआई कार्यकर्ताहरूलाई मलाई समर्थन गर्न आग्रह गर्दछु। यदि म सत्तामा आएँ भने म पीटीआई सहित सबै राजनीतिक कार्यकर्ताहरूलाई रिहा गर्नेछु,” बिलावलले वाचा गरे।

सर्वोच्च अदालतले पीटीआईलाई आफ्नो प्रतिष्ठित चुनाव चिन्ह क्रिकेट ब्याटबाट वञ्चित गरेपछि यसका सबै उम्मेदवारहरू अब स्वतन्त्र रूपमा चुनाव लडिरहेका छन्। सैन्य प्रतिष्ठानले पीटीआई-समर्थित उम्मेदवारहरूलाई प्रचार गर्न अनुमति दिइरहेको छैन । पीपीपी र जमात-ए-इस्लामी पाकिस्तान जस्ता अन्य पार्टीहरूले पीटीआई समर्थकहरूलाई आकर्षित गरिरहेका छन्।

शहबाज सरिफको १६ महिना पुरानो सरकारमा विदेशमन्त्री रहेका बिलावलले भने, “म जनताको समर्थनमा घृणा र विभाजनको राजनीतिको अन्त्य गर्न चाहन्छु। नवाज सरिफ यो चाहँदैनन्। उनी बदला चाहन्छन् र स्वार्थ चाहन्छन्। पीटीआई कार्यकर्ता र समर्थकहरूले आफ्नो भोट खेर फाल्नु हुँदैन।”