काठमाडौं । इजरायली रक्षा बलहरूले गाजा पट्टीको खान युनिसमा सैन्य अपरेशनको एक भागको रूपमा नासेर अस्पतालमा आक्रमण गरेका छन्।

इस्तानबुलबाट बीबीसीका गाजा संवाददाता रुश्दी अबु अलुफका अनुसार अस्पतालका कर्मचारीले रफाहको मुख्य अस्पताल नासेर मेडिकल कम्प्लेक्समा सेना प्रवेश गरेको बताएका छन्।

अबु अलुफका अनुसार नासेर अस्पतालमा उपस्थित तीन पत्रकारमध्ये दुई जना घाइते भएका छन् । इजरायली सेनाले २० जनालाई पक्राउ गरेको छ ।

इजरायली सेनाले धेरै संदिग्धलाई नियन्त्रणमा लिएको जनाएको छ। उसले यो सैन्य अपरेशन ‘सटीक र सीमित’ ढंगले गरिएको पनि बताएको छ ।

सेनाले विरामीहरुलाई अस्पतालमा उपचार जारी राख्न अनुमति दिने बताएको छ ।

सेनाले दोस्रो तल्लामा उपस्थित कर्मचारी, चिकित्सक र बिरामीलाई तल आउन आग्रह गरेको अस्पतालका नर्सले बताए । सेना र त्यसको कुकुर टोलीले सम्पूर्ण परिसरको छानबिन गरिरहेको छ।

अस्पतालबाट भिडियो फुटेज बाहिर आएको छ, जसलाई बीबीसीले पुष्टि गरेको छ, जसमा अस्पताल भित्र धुवाँ देखिएको छ।

यसैबीच, रेडक्रसले संयुक्त राष्ट्र संघलाई इजरायली सेनाको स्थलगत अभियान रोक्न मद्दत गर्न अपील गरेको छ।

उत्तरी गाजा पट्टीबाट भागेर रफाहमा शरण खोजिरहेका लाखौं प्यालेस्टाइनीहरू इजरायलको भू-आक्रमणबाट चिन्तित छन्, र धेरै देशहरूले आक्रमणमा “गम्भीर मानवीय संकट” को चेतावनी दिएका छन्।

इजरायली सेनाले यस ग्राउन्ड अपरेशनको क्रममा उनीहरूको ‘मुख्य उद्देश्य बिरामीहरूको सुरक्षा’ रहेको बताएको छ।

गाजाको स्वास्थ्य मन्त्रालयले विगत २४ घण्टामा इजरायलको हवाई अखडामा ८७ प्यालेस्टाइनीको मृत्यु भएको र १ सय ४ जना घाइते भएको जनाएको छ ।

मन्त्रालयको तथ्यांक अनुसार गाजा पट्टीमा अक्टोबर ७ बाट सुरु भएको इजरायली आक्रमणमा हालसम्म २८ हजार ६ सय ६३ जनाको मृत्यु भएको छ भने ६८ हजार ३ सय ९५ जना घाइते भएका छन् ।