काठमाडाैं। नेकपा (माओावदी केन्द्र) कोशी प्रदेश सरकारबाट बाहिरिएको छ। साथै केदार कार्की नेतृत्वको सरकारलाई दिएको समर्थन फिर्ता लिने निर्णय गरेको छ ।

माओवादी संसदीय दलको सोमबार बसेको बैठकले मन्त्रीहरूलाई फिर्ता बोलाउने निर्णय गरेको हो। कोशी सरकारमा माओवादीबाट गणेश उप्रेती वनमन्त्री, राजेन्द्र कार्की सामाजिक विकासमन्त्री र नारायण बुर्जामगर खानेपानी मन्त्री थिए ।

केन्द्रीय सहमति अनुसार कोसी प्रदेश सरकारको नेतृत्व नेकपा एमालेले पाउने छ। सोही अनुसार एमालेले सरकार छाड्न माओवादी र एकीकृत समाजवादीलाई दबाब दिँदै आएको छ।

कोशीमा माओवादी केन्द्रका १३ सांसद रहेका छन्। ९३ सदस्यीय कोशी प्रदेशसभामा बहुमतका लागि ४६ सांसद आवश्यक पर्दछ।  कोशीमा एमालेका ४०, कांग्रेसका २९, राप्रपाका ६, एकीकृत समाजवादीका ४ र जसपाका एक सांसद रहेका छन्।

एमालेले संविधानको धारा १६८ को उपधारा ५ अनुसार प्रदेशसभामा बहुमत पुर्‍याउने सांसदको नेतृत्वमा गठन भएको सरकारको विकल्पमा सोही धारा अनुसार बहुमत पुर्‍याउने अर्का सांसदले दाबी गर्न पाउने जिकिर गर्दै आएको छ।

यता मुख्यमन्त्री केदार कार्कीले भने धारा १६८ को उपधारा ५ को सरकार अन्तिम भएकाले त्यो सरकार अल्पमतमा परेको अवस्थामा संविधानको धारा १६८को उपधारा ७ अनुसार प्रदेशसभा विघटन भई मध्यावधि निर्वाचन हुने दाबी गर्दै आएका छन्।