काठमाडौं। कतारका अमिर शेख तमिम विन हमाद अल थानीको दुईदिने नेपालको राजकीय भ्रमणमा खबरलाई आज काठमाडौंबाट प्रकाशित अखबारले प्राथमिकताका साथ प्रकाशन गरेका छन्। राष्ट्रपति रामचन्द्र पौडेलको मैत्रीपूर्ण निमन्त्रणमा कतारका अमिर मंगलबार काठमाडौं आएका हुन्।

मंगलबार अपराह्न काठमाडौं ओर्लेपछि कतारका अमिरले साँझ राष्ट्रपति पौडेलसँग भेटवार्ता गरेका थिए। उनी मंगलबार राति राष्ट्रपति पौडेलले आयोजना गरेकाे राजकीय भोजमा सरिक भएका थिए। कतारी अमिरले आज प्रधानमन्त्रीसँग द्विपक्षीय वार्ता गर्ने र शिक्षा, खेलकुदलगायत क्षेत्रमा हुने द्विपक्षीय समझदारी र सम्झौताा हस्तक्षर गर्ने कार्यक्रम छ।

काठमाडौंबाट प्रकाशित प्रमुख अखबारले राष्ट्रपति पौडेल र कतारी अमिरबीचको भेटवार्तालाई प्रमुखताका साथ छापेका छन्। अधिकांश अखबारले सो भेटवार्तामा इजरायलमा हमासको आक्रमणमा परी बेपत्ता भएका नेपाली विद्यार्थी विपिन जोशीको रिहाइका लागि पहल गर्न राष्ट्रपति पौडेलले गरेको आग्रहलाई समाचारको मुख्य विषय बनाएका छन्।

देशको सबैभन्दा पुरानो गोरखापत्र’ दैनिकले प्रथम पृष्ठमा राष्ट्रपति पौडेल र अमिर थानीबीच भेटवार्ता भेटवार्ता भएको र त्यसबाट बृहत साझेदारीको मार्ग प्रशस्त भएको सम्बन्धी समाचार प्रकाशन गरेको छ।

उक्त भेटमा राष्ट्रपति पौडेलले नेपाल र कतारबीचको उच्चस्तरीय भ्रमणको आदानप्रदानबाट सरकारबीचको आपसी सम्बन्ध र जनसम्बन्धको विकास र विस्तारमा योगदान पुर्याउने बताएको समाचारमा उल्लेख छ।

भेटमा राष्ट्रपति पौडेलले इजरायलमा हमासको आक्रमणमा परी बेपत्ता भएका नेपाली विद्यार्थी विपिन जोशीको रिहाइका लागि पहल गरिदिन कतारका अमिरसँग आग्रह गरेको सम्बन्धी समाचारलाई पनि प्राथमिकताका साथ छापेको छ।

राष्ट्रपतिसँगको भेटमा कतारका अमिरले नेपाल र कतारबीचको लामो सहकार्यलाई थप सुदृढ तुल्याउन कतार सरकारले बलियो पहल गर्ने बताएको विषयलाई पनि गोरखापत्रले प्रमुखताका साथ समेटेको छ।

‘कान्तिपुर’ दैनिकले राष्ट्रपति पौडेलसँग भेटका लागि शीतलनिवासमा पुेका कतारी अमिरको तस्वीर पहिलो पृष्ठमा छापेको छ। कान्तिपुरले कतारी अमिरको नेपाल भ्रमणसम्बन्धी समाचार दोस्रो र तेस्रो पृष्ठमा प्रकाशित गरेको छ।

कान्तिपुरले ‘कतारी अमिरः कान्छा युवराजदेखि प्रभावशाली शासकसम्म’ शीर्षकमा पूरा पृष्ठमा अमिरको उदय, कतारी समृद्धिको संवाहक तथा विश्वमञ्चमा समन्वयकारी र नेतृत्वदायी भूमिकामा देखिने प्रयास गरिरहेको विषयलाई समेटेको छ।

यस्तै तेस्रो पृष्ठमा राष्ट्रपति पौडेलसँग कतारी अमिरको भेटसम्बन्धी समाचार र तस्वीर प्रकाशन भएको छ। उक्त समाचारमा इजरायलमा हमासको आक्रमणमा परी बेपत्ता नेपाली विद्यार्थी जोशीको रिहाइका लािग पहल गरिदिन राष्ट्रपति पौडेलले गरेको आग्रहलाई मुख्य विषय बनाइएको छ।

कान्तिपुरले चार जेट विमानसहित कतारी अमिर काठमाडौँ ओर्लिएको, आज प्रधानमन्त्री दाहालसँग द्विपक्षीय भेटवार्ता गर्ने र पाँच समझदारीपत्रमा हस्ताक्षर हुने समाचार पनि प्रकाशन गरेको छ।

‘नयाँ पत्रिका’ दैनिकले कतारी अमिरको भ्रमणसम्बन्धी खबरलाई पहिलो पृष्ठमा नै समावेश गरेको छ। राष्ट्रपति पौडेल र कतारी अमिरबीच वार्ता भएको र सो वार्तामा नेपाली विद्यार्थी जोशीको रिहाइदेखि कतारमा काम गर्ने नेपाली श्रमिकको सुरक्षा र नेपालमा लगानीसम्मका विषयमा छलफल भएको नयाँ पत्रिकाले उल्लेख गरेको छ।

नयाँ पत्रिकाले कतारी अमिरले नेपाली विद्यार्थी जोशीको रिहाइका लागि पहल गर्ने, जलवायु परितर्वनको मुद्दामा राष्ट्रपतिको चासो, विमानस्थलमा भव्य स्वागत, आज प्रधानमन्त्री दाहालसँग द्विपक्षीय वार्ता गर्ने तथा कतारी अमिरको सुरक्षामा प्रविधिको अधिकतम् प्रयोग उपशीर्षकमा समाचार छापेको छ।

‘अन्नपूर्ण पोष्ट’ दैनिकले कतारका अमिरको नेपाल भ्रमणसम्बन्धी समाचार ‘विपिन उद्धारको पहल गरिदिन कतारी राजासँग राष्ट्रपतिको आग्रह’ शीर्षकमा ‘एंकर न्यूज’का रुपमा प्रकाशन गरेको छ।

उक्त समाचारमा कतारी अमिर थानीले ‘नेपालसँग सहयोगका क्षेत्र बढाउन कतार प्रतिबद्ध’ उपशीर्षकमा सोसम्बन्धी विषयलाई पनि छापेको छ। अन्नपूर्ण पोष्टले कतारी राजालाई विमानस्थलमा २१ तोपको सलामी दिइएको, सुरक्षा व्यवस्था कडा पारिएको तथा अमिरको भ्रमणमा मन्त्री र उच्च पदस्थ अधिकारी सहभागी भएको उल्लेख गरेको छ।

‘राजधानी’ दैनिकले पनि अमिरको नेपाल भ्रमणसम्बन्धी समाचारलाई प्रमुखताका साथ प्रकाशन गरेको छ। पहिलो पृष्ठमा ‘राष्ट्रपति पौडेल र कतारका अमिरबीच द्विपक्षीय छलफल’ शीर्षकमा समाचार छापिएको छ। मध्यपूर्वमा बढेको द्वन्द्वप्रति राष्ट्रपति पौडेलले चिन्ता व्यक्त गरेको विषयलाई समाचारमा समेटिएको छ।

राजधानीले दोस्रो पृष्ठमा ‘कतारी अमिर नेपालमा’ शीर्षकमा ‘फोटो फिचर’ पनि छापेको छ। कतारी भ्रमणदलमा सहभागी, प्रधानमन्त्रीसँग द्विपक्षीय भेटवार्ता तथा सम्झौता र दक्षिण एसियामा पहिलो श्रम सम्झौता गर्ने मुलुक कतार उपशीर्षकमा भ्रमणसम्बन्धी समाचार प्रकाशन गरेको छ।

‘हिमालय टाइम्स’ दैनिकले ‘मध्यपूर्व एसियाबाट पहिलो उच्चस्तरीय भ्रमण’ शीर्षकमा पहिलो पृष्ठमा कतारी अमिरको भ्रमणसम्बन्धी समाचार छापेको छ। हिमालय टाइम्सले ‘डेढ सय जनाको भ्रमण दल, ११ जनाको विशेष प्रतिनिधिमण्डल छुट्टै’, ‘विपिन जोशी रिहाइका लागि पहल गरिदिन राष्ट्रपतिको आग्रह’, ‘आज प्रधानमन्त्रीसँग भेटवार्ता, के-के विषयमा हुँदै छ समझादारी र सम्झौता?’, ‘कतारबाट नेपालले पैसा र प्रविधि ल्याउन सक्नुपर्छः पूर्वराजदूत उपाध्याय’ र ‘श्रमिकको हितअनुकूल श्रम सम्झौता परिमार्जन गर्न आवश्यक : पूर्व-परराष्ट्रमन्त्री डा खड्का’ उपशीर्षकमा पुरक समाचार पनि प्रकाशन गरेको छ।

अङ्ग्रेजी दैनिक ‘द राइजिङ नेपाल’ले राष्ट्रपति पौडेल र कतारी अमिरबीचको भेटवार्तासम्बन्धी समाचारलाई पहिलो पृष्ठमा छापेको छ। कतारी अमिरको सुरक्षाको जिम्मेवारी नेपाली सेनाले लिएकोसम्बन्धी समाचार पनि राइजिङ नेपालमा छ।

अर्को अङ्ग्रेजी दैनिक ‘द काठमाडौँ पोष्ट’ले पनि राष्ट्रपति पौडेल र कतारी अमिरको भेटसम्बन्धी समाचारलाई पहिलो पृष्ठमा प्रकाशन गरेको छ। सो भेटमा राष्ट्रपति पौडेलले नेपाली विद्यार्थी विपिनको रिहाइका लागि पहल गरिदिन गरेको आग्रहलाई प्रमुख विषय बनाइएको समाचार काठमाडौं पोष्टले छापेको छ।

विद्युतीय सञ्चार माध्यम रेडियो नेपाल, नेपाल टेलिभिजनलगायत सार्वजनिक तथा निजी क्षेत्रका प्रसारण संस्था तथा सबै ‘अनलाइन न्युजपोर्टल’ले कतारी अमिरको भ्रमणसम्बन्धी समाचार एवं तस्वीर प्रकाशन एवं प्रसारण गरेका छन्।