काठमाडौं। आजदेखि देशभरका सिनेमाघरमा चलचित्र ‘मनसरा’ प्रदर्शनमा आएको छ। शुक्रबारदेखि प्रदर्शनअन्तर्गत आजदेखि सिनेमाघरमा ‘मनसरा’ प्रदर्शनमा आएको हो। चलचित्रलाई मल्टिप्लेक्सहरूले ठूलो मात्रामा शोज दिएका छन्।

उपेन्द्र सुब्बाको लेखन तथा निर्देशन रहेको चलचित्रमा दयाहाङ राई, प्रवीण खतिवडा, मिरुना मगर र मेनुका प्रधान मुख्य भूमिकामा हुनुहुन्छ भने हेमन्त बुढाथोकी शान्ति गिरी, नेनहान राईलगायतको अभिनय छ। चलचित्रका निर्माता छायांकार शैलेन्द्रध्वज कार्की छन्। चलचित्रको छायांकार पनि उनी नै हुन्। यो चलचित्रले अन्तरजातीय सम्बन्धको आयामलाई कथाको मुख्य विषयवस्तु बनाएको छ।

चलचित्रको बुधबार पुल्चोकस्थित क्युएफएक्स लविम मलमा प्रिमियर गरिएको थियो। प्रिमियर शोमा चलचित्र हेर्न सेलिब्रेटी तथा पत्रकारको बाक्लो उपस्थिति थियो। प्रिमियरमा चलचित्र उत्कृष्ट बनेको दर्शकले प्रतिक्रिया दिएका थिए। कथा, प्रस्तुति, कलाकारहरूको काम राम्रो लागेको फिल्मकर्मीहरूले प्रतिक्रिया दिएका थिए।

चलचित्रमा विष्णकुमार लिम्बु, मनोरथ पोखरेल, पर्शु अधिकारी, पिटर गुरुङ तथा जीवन लिम्बु थाक्लुङ सहनिर्माता हुन्। निमेश श्रेष्ठको सम्पादन, अर्जुन कार्कीको रंग संयोजनको साथमा श्रवल राज पाण्डेको साउण्ड डिजाइन रहेको छ भने मानाहाङ लावती, मनिक शंखर र सुभम चाम्लिङ राईको संयुक्त कला निर्देशन रहेको छ। चलचित्र एप्पल इन्टरटेन्मेन्ट कम्पनीले वितरण गर्दैछ। क्युएफएक्स थिएटर पार्टनर रहेको छ भने जी टु वान डिजिटल पार्टनर हो।

ठूला मल्टिप्लेक्स चेनमा उच्च शो पाएको यो चलचित्रले आक्रामक व्यापार गर्ने देखिएको छ। स्टारकास्ट रहेको चलचित्र तथा कबड्डीको ब्राण्डका कारण पनि चलचित्रले दर्शकलाई सिनेमा हलसमम तान्ने अनुमान छ । ट्रेलरले बनाएको हाइपले पनि यो चलचित्र प्रतिक्षित बनेको छ।