काठमाडौं। ब्राजिलियन फुटबल स्टार नेइमार जुनियर यो सिजन स्पेनिस क्लब बार्सिलोना अनुबन्ध नहुने पक्का भएको छ। बार्सिलोनाका उप–प्रमुख जोर्डि कार्डोनेरले नेइमार यस सिजन बार्सा नआउने स्पष्ट पारेका हुन्। यससँगै नेइमारको बार्सिलोना सपना अधुरो बनेको छ।

नेइमार बार्सिलोना अनुबन्ध हुने हल्लाकाबीच बार्साका उप–प्रमुख जोर्डि कार्डोनेरले नेइमारबारे सिर्जना भएका भ्रमलाई छर्लङ्ग पारेका हुन्। यद्यपी उनले नेइमार पीएसजीमा खुशी नभएको विषयमा सहमति जनाए। किनभने पछिल्लो समय नेइमारले आफूलाई बार्सा फर्कन मन लागेको खुलेरै बताउँदै आएका छन्।

टिभीथ्रीसँग बोल्दै उनले भने,‘नेइमार, उनी पीएसजीमा खुशी छैनन्। तर अवस्था यस्तो छ कि त्यो विषय पेरिसमै सुल्झाएको राम्रो। आज, यही समयमा हामी औपचारिक घोषणा गर्दछौं, नेमार आगामी दिनमा बार्सा आउन सक्लान्। तर यसपटक मिल्दैन।’

यसअघि इभान राकिटिक र फिलिप कोटिन्हो पीएसजीलाई दिएर नेइमार बार्सा ल्याउने हल्ला पनि चलेको थियो। यस विषयमा उनले भने,‘हामी आफ्ना खेलाडीलाई माया र आदर गर्दछौं। त्यसैले हामी यस्ता विषयमा बोल्न उचित ठान्दैनौं।’