काठमाडौं। सन् २०२२ मा कतारमा आयोजना हुने फिफा विश्वकप अन्तर्गत एसियाको दोस्रो चरणको छनोट खेलका लागि मंगलबार नेपालले ३१ सदस्यीय प्रारम्भिक फुटबल खेलाडीको घोषणा गरेको छ । मुख्य प्रशिक्षक योहान कालिनले प्रशिक्षणमा रहेका ३६ खेलाडीबाट ३१ जना छनोट गरेका हुन् ।

पहिलो चरणमा प्रशिक्षणमा रहेका पाँच खेलाडी बाहिरिएका छन् । टिम बाहिरिनेमा रक्षक कमल श्रेष्ठ, नितिन थापा, सेसेहाङ आङ्देम्बे, अमित तामाङ र मिक्चेन तामाङ रहेका छन् । विश्वकप छनोटमा नेपाल समूह ‘बी’ मा रहेको छ । नेपालको समूहमा अष्ट्रेलिया, जोर्डन, कुवेत र चाईनिज ताइपेई रहेका छन् । दोस्रो चरणको छनोट सन् २०१९ को सेप्टेम्बर ५ देखि सन् २०२० को जुन ९ जुनसम्म सञ्चालन हुनेछ ।

नेपालले छनोट चरणको पहिलो खेल कुवेतसँग खेल्दैछ । होम र अवेका आधारमा खेलिने यस खेलमा नेपालको दशरथ रंगशालाको निर्माण कार्य नसकिएकोले नेपालले दुवै खेल कुवेतमा खेल्ने तयारी गरेको छ । कुवेतसँगको दोस्रो खेल नोभेम्बर १९ मा उसैको मैदानमा हुनेछ । यसैगरी नेपालले सेप्टेम्बर १० मा चाइनिज ताईपे र अक्टोबर १५ मा जोर्डनसँग उसैको मैदानमा खेल्नेछ ।

नेपालले चाईनिज ताईपेसँग सन् २०२० को मार्च २६ को अवे र जोर्डनसँग सन् २०२० को जुन ४ मा दशरथ रंगशालामा खेल्नेछ । यस्तै नेपालले अष्ट्रेलियासँग आगामी अक्टोबर १० मा अवे खेल खेल्नेछ । घरेलु मैदानमा भने अष्ट्रेलियासँग सन् २०२० को मार्च ३१ मा खेल्नेछ । विश्वक खेलिसकेको अस्ट्रेलिया नेपालका लागि बलियो प्रतिद्वन्द्वी हो ।

एएफसीले एसियाका ४० देशलाई आठ समूहमा विभाजन गरेको छ । प्रत्येक समूहमा पाँच टोली छन् । दोस्रो चरणको छनोटबाट आठवटै समूहका विजेता र चारवटा उत्कृष्ट उपविजेता गरी १२ टोली तेस्रो चरणमा छनोट हुनेछन् । तेस्रो चरणमा छनोट हुने टोलीले सन् २०२३ को एसियन कप खेल्ने मौका पनि पाउँनेछन् ।