काठमाडौं । चीनको एक अदालतले एक पूर्व बैंकरलाई १५१ मिलियन डलर घुस लिएको अभियोगमा मृत्युदण्डको सजाय सुनाएको छ । यो आफैमा दुर्लभ घटना हो।

चाइना हुआरङ इन्टरनेशनल होल्डिङ्स (सीएचआईएच) का पूर्व महाप्रबन्धक बाई तियानहुईलाई तियान्जिनको एक अदालतले मंगलबार मृत्युदण्डको सजाय सुनाएको राज्यको समाचार एजेन्सी सिन्ह्वाले बुधबार जनाएको छ।

बाई तियानहुईलाई जीवनभरको लागि उनको राजनीतिक अधिकार खोसियो र उनको सबै व्यक्तिगत सम्पत्ति जफत गरियो। अदालतले आफ्नो फैसलामा उनको अवैधानिक कमाई फिर्ता गरी देशको कोषमा जम्मा गर्ने जनाएको छ ।

अदालतले भनेको छ – बाईले आफ्नो हैसियतको फाइदा उठाएर अरूलाई ठूलो रकमको सट्टामा परियोजनाहरू प्राप्त गर्न र वित्तपोषण गर्न मद्दत गरे।

अदालतको फैसलामा बाईले घुसखोरीको अपराध गरेको उल्लेख छ । घुस लिने रकम अत्याधिक थियो, अपराधको अवस्था अत्यन्त गम्भीर थियो र त्यसको सामाजिक प्रभाव अत्यन्तै नराम्रो थियो, जसले देश र जनताको हितमा ठूलो नोक्सान पुर्याएको थियो ।

सन् २०१२ मा सत्तामा आएदेखि चिनियाँ राष्ट्रपति सी जिनपिङको भ्रष्टाचार विरोधी अभियानमा धेरै चिनियाँ अधिकारीहरूलाई कडा सजाय दिइएको छ। तर मृत्युदण्ड अत्यन्तै दुर्लभ छ किनभने तिनीहरूमध्ये धेरैले दोषी स्वीकार गर्छन् र लामो समयसम्म जेलमा बस्न सहमत हुन्छन्।

बाई भ्रष्टाचारको लागि मृत्युदण्ड पाउने चीनको दोस्रो हुआरङ अधिकारी हुन्। जनवरी २०२१ मा, सोही अदालतले सीएचएएम का पूर्व अध्यक्ष र बाईका पूर्व हाकिम लाइ सियाओमिनलाई पनि यस्तै सजाय सुनाएको थियो।

सजाय सुनाएको एक महिनापछि लाइलाई फाँसी दिइएको थियो । उनी २४ करोड ७० लाख डलर घूस लिएको, ३.४६ मिलियन डलरभन्दा बढीको सार्वजनिक सम्पत्ति हिनामिना गरेको र बहुविवाह गरेको आरोपमा दोषी पाइयो।