काठमाडौं । बिहीबार जम्मुमा यात्रु बोकेको बस भीरबाट खस्दा २२ जनाको मृत्यु भएको छ भने धेरै घाइते भएका छन् ।

जम्मूका डीसी सचिन कुमारले घटनाको बारेमा भने , “घटनामा २२ जनाको मृत्यु भएको छ र घाइतेहरूलाई जीएमसी जम्मूमा भर्ना गरिएको छ, जहाँ उनीहरूको उपचार भइरहेको छ। सरकारले छिट्टै आर्थिक सहयोग गर्ने घोषणा गरेको छ । अतिरिक्त जिल्ला अधिकारीको नेतृत्वमा छानबिन गर्न निर्देशन दिइएको छ र सात दिनभित्र प्रतिवेदन बुझाउनेछ ।”

अल इन्डिया रेडियो समाचारका अनुसार जम्मुको अखनूर क्षेत्रमा ओभरलोड बस गहिरो भीरबाट खसेको हो । त्यसमा उत्तर प्रदेश र राजस्थानका तीर्थयात्रीहरू बसेर शिव खोरी जाँदै थिए ।

जम्मुका स्थानीय पत्रकार डा डीपी उपाध्यायले ६९ जना घाइते भएको र धेरैको अवस्था गम्भीर रहेको बताए । मृत्यु हुने अधिकांश तीर्थयात्री उत्तर प्रदेशको हाथरस जिल्लाको सोही गाउँका थिए।

उनले उक्त बसमा हाथरस र अलिगढका तीर्थयात्री रहेको र केही यात्रु राजस्थानका पनि रहेको बताए । यी सबै वैष्णोदेवी जाँदै थिए।