काठमाडौं । स्वीडेनमा मङ्गलबार राति कसैले मस्जिद बाहिर मरेको सुँगुर फाले । समाचार एजेन्सी एएफपीका अनुसार स्वीडेनको प्रहरीले यसको पुष्टि गरेको छ। प्रहरी अधिकारीहरूले बुधबार उक्त घटना दक्षिण स्वीडेनको स्कोभदे सहरमा भएको बताएका छन्।

घटनापछि मुस्लिम समुदायमाथि हिंसाको उजुरी परेको प्रहरीले जनाएको छ । घटनाको अनुसन्धान भइरहेको छ । मस्जिद सञ्चालन गर्ने संस्थाका प्रमुख स्माजो सहतले पहिले केही जनावर भेटिएको जानकारी पाए पनि त्यहाँ गएर हेर्दा त्यो मरेको जंगली बँदेल भएको बताए ।

उनले बताएअनुसार राति अबेर एक व्यक्ति कारमा आएका थिए जसले सुँगुरलाई मस्जिद नजिकै फ्याँकेका थिए । उनी को थिए र कहाँबाट आए भन्ने थाहा छैन, तर मस्जिदमा जडान गरिएका सीसीटीभी क्यामेराहरूमा उनको गतिविधि कैद भएको छ।

यो मस्जिद एक वर्षअघि मात्र खोलिएको स्माजो सहतले बताए । त्यसयता मस्जिद विरुद्ध कुनै धम्की आएको छैन। अब यो सबै कसले गर्यो भन्ने अनुमान मात्र गर्न सकिन्छ, बाँकी अनुसन्धानको विषय हो । यस मस्जिदसँग १० लाखभन्दा बढी मानिस आबद्ध छन्।

शरणार्थीहरूको समस्यासँग लडिरहेको स्वीडेनमा लामो समयदेखि मुस्लिमहरूविरुद्ध घृणाका घटनाहरू सार्वजनिक भइरहेका छन्। यस वर्षको मे महिनाको सुरुमा स्विडेनी सरकारले एउटा मामलामा मानिसहरूलाई कुरान जलाउन अनुमति दिएको थियो।

मृत सुँगुर भेटिएको सहरमा यो अनुमति दिइएको थियो। इस्लामिक सहयोग संगठन (ओआईसी) ले यसको विरोध गरेको थियो। ओआईसीले स्वीडेनलाई मुस्लिम धर्मावलम्बीहरुको पवित्र पुस्तक जलाउन नदिन आग्रह गरेको थियो ।