काठमाडौं । सिक्किम विधानसभा चुनावमा भारी जित हासिल गरेका मुख्यमन्त्री प्रेमसिंह तामाङले शपथ लिएको भोलिपल्टै उनकी पत्नी कृष्णकुमारी राईले सांसद पदबाट राजीनामा दिएकी छन् ।

भर्खरै सम्पन्न विधानसभा चुनावमा कृष्ण कुमारी राईले सिक्किम डेमोक्रेटिक फ्रन्ट (एसडीएफ) का उम्मेदवार विमल राईलाई पराजित गर्दै नामची-सिंघिथाङ सिटमा विजयी भएकी थिइन्।

विधानसभा सचिव ललितकुमार गुरुङले सिक्किम क्रान्तिकारी मोर्चाकी नेतृ कृष्णकुमारी राईको राजीनामा सभामुख एमएन शेर्पाले स्वीकृत गरेको जानकारी दिए । अरुणाचल प्रदेशका मुख्यमन्त्री पेमा खाण्डुको सपथ ग्रहण समारोहमा सहभागी हुन मुख्यमन्त्री अहिले इटानगर पुगेका छन् ।

श्रीमतीको राजीनामाबारे प्रेमकुमार तामाङले भने, ‘पार्टीको सर्वसम्मतिको निर्णयअनुसार मेरी श्रीमतीले सिट छाड्नुभएको आदरणीय जनप्रतिनिधिलाई जानकारी गराउन चाहन्छु । पार्टीको हित र उद्देश्यलाई प्राथमिकता दिएर उहाँले यो काम गर्नुभएको छ ।’

मुख्यमन्त्री तामाङले भने, ‘कृष्णकुमारी राई एसकेएम पार्टीको संसदीय समितिको आग्रहमा चुनाव लड्नुभएको थियो भन्ने कुरा ध्यान दिनु जरुरी छ । पार्टीको तर्फबाट अध्यक्षको हैसियतले उहाँको समर्पण र अटल सहयोगको लागि उहाँप्रति हार्दिक आभार व्यक्त गर्दछु।’

एसकेएम प्रमुखले भने ‘पार्टीले सिक्किमका जनताको सेवा गर्ने वास्तविक र समर्पित पदाधिकारीहरूलाई अवसर दिन प्रतिबद्ध छ। नाम्ची-सिंघिथाङ निर्वाचन क्षेत्रको हकमा पनि यहाँका बासिन्दाले आफ्नो हित पूरा गर्ने समर्पित र सच्चा विधायक पाउनेछन् । म्याडम कृष्णा राई र म तपाईको आवश्यकता पूरा गर्न पूर्णरुपमा लाग्नेछौं।’