काठमाडौं । बेलायतको सबैभन्दा धनी हिन्दुजा परिवारका चार सदस्यमाथि स्वीट्जरल्याण्डको जेनेभामा मुद्दा चलिरहेको छ । यो परिवारले आफ्ना घरेलु कामदारका लागिभन्दा कुकुरका लागि धेरै पैसा खर्च गरेको आरोप छ।

हिन्दुजा परिवारको सम्पत्ति करिब ४७ अर्ब डलर छ । हिन्दुजा परिवार शोषण र मानव बेचबिखनको आरोपको सामना गर्दैछ।

परिवारको जेनेभाको अर्बपतिहरूको क्षेत्र कोलनीमा एउटा भिला छ। परिवारविरुद्ध बालबालिका र परिवारका लागि भारतबाट घरेलु कामदार ल्याएको आरोप छ ।

प्रकाश हिन्दुजा, कमल हिन्दुजा, उनका छोरा अजय र बुहारी नम्रताले आफ्ना स्टाफको राहदानी जफत गरेको आरोप छ ।

कामदारहरूलाई दिनमा १८ घण्टा काम लगाएर दिनको ८ डलर मात्र तलब दिइयो र घर छोड्न थोरै स्वतन्त्रता मात्र दिइएको आरोप छ ।

तर, शोषणको आरोपमा गत साता आर्थिक सम्झौता भएको थियो । तर हिन्दुजा परिवार विरुद्ध मानव बेचबिखनको मुद्दा चलिरहेको छ । स्विट्जरल्याण्डमा तस्करीलाई गम्भीर अपराधको रूपमा वर्गीकृत गरिएको छ।

हिन्दुजा परिवारले भने आफूमाथि लागेको आरोप अस्वीकार गर्दै आएको छ । हिन्दुजा परिवारका वकिलले गत साता नै शोषण मुद्दामा टुङ्गो लागेको बताएका छन् ।

वकिलले कम तलबको आरोप अस्वीकार गरे। यसलाई सही सन्दर्भमा हेर्नुपर्ने उनको भनाइ छ । उनका अनुसार कर्मचारीले खाना र बास पनि पाएका थिए ।

लामो समय काम गरेको आरोपमा वकिलले हिन्दुजा परिवारका बालबालिकासँग बसेर चलचित्र हेर्नुलाई कामको घण्टा मान्न नहुने पनि बताए ।

हिन्दुजा परिवारका लागि पहिले काम गरेका केही कामदारहरूले हिन्दूजा परिवारले उनीहरूलाई राम्रो व्यवहार गरेको बताए। परिवारले उनीहरूलाई सम्मानपूर्वक व्यवहार गर्थे।

अन्तर्राष्ट्रिय संघसंस्थाको केन्द्र र विश्वका धनीहरुको बासस्थान मानिने जेनेभामा यस्तो घटना सार्वजनिक भएको यो पहिलो पटक भने होइन ।

सन् २००८ मा लिबियाका पूर्व तानाशाह मुअम्मर गद्दाफीका छोरा ह्यानिबल गद्दाफीलाई पनि पाँचतारे होटलबाट पक्राउ गरिएको थियो । ह्यानिबल र उनकी पत्नीलाई नोकरहरू कुटेको आरोप लगाइएको थियो।