काठमाडौं । रुसले युक्रेनी आक्रमणको कडा जवाफ दिने प्रतिबद्धता व्यक्त गरेको छ ।

रुसी विदेश मन्त्रालयका प्रवक्ता मारिया जाखारोभाले एक विज्ञप्तिमा भनिन्, “रुसको शान्तिपूर्ण जनतालाई तर्साउन युक्रेनले आफ्ना आतंकवादी गतिविधिहरू बढाउँदैछ।”

“युक्रेनलाई राम्ररी थाहा छ कि उसको पछिल्लो आक्रमण कुनै पनि हालतमा सैन्य अभियान होइन,” उनले भनिन् ।

युक्रेनी आक्रमणको वर्णन गर्दै परराष्ट्र मन्त्रालयकी प्रवक्ताले क्षेत्रीय राजधानी कुर्स्कमा रातभर हमला भएको बताइन् ।

यसअघि कुर्स्कका स्थानीय गभर्नरले युक्रेनी मिसाइलको भग्नावशेष सहरको बहुतले भवनमा खस्दा १३ जना घाइते भएको बताएका थिए।

युक्रेनसँग सीमा जोडिएको रुसको पश्चिमी बेल्गोरोड क्षेत्रका गभर्नरले भर्खरै युक्रेनले तीनवटा बस्तीमा गरेको आक्रमणमा एक सर्वसाधारण घाइते भएको बताएका छन् ।

बेलगोरोड क्षेत्रका गभर्नर व्याचेस्लाभ ग्लाडकोभले भने, “प्रारम्भिक जानकारीले शेबेकिनो सहरमा बस्ने व्यक्तिको खुट्टा र हातमा चोट लागेको देखाएको छ र अहिले उनलाई उपचारको लागि क्षेत्रीय राजधानी बेलगोरोड लगिएको छ ।”

तर, कुन हतियारले आक्रमण गरिएको हो भन्ने उनले खुलाएनन् । केही गाउँमा मिसाइल आक्रमणबाट भवनमा क्षति पुगेको उनले बताए ।