काठमाडौं । भारतीय टोलीका ओपनर पृथ्वी शाविरुद्ध अदालतबाट हाजिर हुनका लागि समन जारी भएको छ । २०२३ को सुरुमा उनको सोशल मिडिया इन्फ्लुएन्सर सपना गिल र उनका साथीहरूसँग झगडा भएको थियो । अहिले मुम्बईको डिन्डोशी सत्र अदालतले यस मामिलामा दोस्रो समन जारी गरेको छ।

पृथ्वी शाविरुद्ध पहिलो समन जारी हुँदा उनी अदालत उपस्थिन भएका थिएनन् । उनको तर्फबाट कुनै वकिल उनको प्रतिनिधित्व गर्न पनि अदालत पुगेका थिएनन् । तर अब डिन्डोशी सत्र अदालतले दोस्रो पटक समन जारी गर्दै पृथ्वी शालाई हाजिर हुन भनेको छ ।

पृथ्वी शाको विवाद सन् २०२३ को सुरुमा भएको हो । त्यतिबेला पृथ्वी शाले मुम्बईको एक होटलमा सामाजिक सञ्जाल प्रभावकारी सपना गिल र उनका साथीहरूसँग झगडा गरेका थिए। यस मामिलामा पृथ्वी शाको तर्फबाट मुद्दा दर्ता भएको थियो, जसमा ८ जनालाई कारबाही गरिएको थियो। सपना गिल पनि पक्राउ परेकी थिइन् ।

यो सम्पूर्ण मामिला १५ फेब्रुअरी २०२३ को हो, जब पृथ्वी शा आफ्ना साथीसँग सान्ता क्रुजको पाँच तारे होटलमा डिनर गर्न गएका थिए । त्यस क्रममा दुईजनाले पृथ्वी शासँग सेल्फी लिएका थिए । पछि तिनै मानिस फेरि आएर अरुसँग पनि सेल्फी लिन आग्रह गरे ।

त्यसपछि पृथ्वी शाले आफू साथीहरूसँग खाना खान आएको र अल्मलिन नचाहेको भन्दै इन्कार गरे । त्यसपछि विवाद बढ्दै गएपछि दुई पक्षबीच झडप भएको थियो । त्यसपछि पृथ्वीका साथीको उजुरीका आधारमा प्रहरीले सपना गिलसहित ८ जनाविरुद्ध मुद्दा दर्ता गरेको थियो । उक्त मुद्दामा सपना गिललाई पनि पक्राउ गरिएको थियो । पछि सपना धरौटीमा छुटिन् ।

दुवै पक्षले एकअर्काविरुद्ध मुद्दा दर्ता गरेका छन् । सपना गिल र पृथ्वी शाबीचको झगडाका केही भिडियो पनि सार्वजनिक भएका छन् । दुवै पक्षले एकअर्कामाथि आक्रमणको आरोप लगाएका छन् । सपनाले पृथ्वीमाथि यौन दुर्व्यवहारको आरोप पनि लगाएकी थिइन् । त्यसपछि सपनाले प्रहरीले आफ्नो एफआइआर दर्ता नगरेको दाबी गरेकी थिइन् । यसपछि उनी सिधै अदालत पुगिन् । अदालतको हस्तक्षेपपछि प्रहरीमा मुद्दा दर्ता भएको थियो ।

सपना गिलले आईपीसीको धारा ३५४, ५०९, ३२४ अन्तर्गत ब्याटले कुटपिट र दुर्व्यवहार सहित केही मामिलामा उजुरी दिएकी छिन्। यो उजुरी गर्दा सपनाले सरकारी अस्पतालबाट मेडिकल सर्टिफिकेट पनि दिएकी थिइन् । जसमा यौन उत्पीडनको पनि उल्लेख छ ।

प्रहरीले एयर ट्राफिक कन्ट्रोल (एटीसी) टावरको सीसीटीभी फुटेज पनि जाँचेको अदालतलाई बताएको छ । यी भिडियोहरू हेरेपछि सपनाले हातमा बेसबल ब्याट लिएर पृथ्वी शाको कारलाई पछ्याइरहेको खुलासा भयो । सपना र उनका साथीहरूले क्रिकेटरको गाडीको सिसा पनि तोडेका छन् । सीआईएसएफ अधिकारीहरूले पनि सपना गिलले दाबी गरेजस्तो कुनै घटना नभएको प्रहरीलाई बताए।

अधिकारीले घटनाको जानकारी पाएपछि तुरुन्तै घटनास्थल पुगेका थिए, जहाँ उनले हातमा बेसबल ब्याट लिएकी एक महिलालाई देखे। प्रहरी घटनास्थलमा आएको देखेर पुरुष साथीले महिलाको ब्याट खोसेर फ्याँकिदिए । अदालतमा पेश गरिएको आफ्नो प्रतिवेदनमा प्रहरीले सीआईएसएफ अधिकारीको बयानलाई उद्धृत गर्दै घटनास्थलमा कुनै पनि पुरुषले महिलामाथि आक्रमण नगरेको बताएको छ ।