काठमाडौं । मलेसियाको एयरलाइन्स कम्पनी एयर एसियाले काठमाडौं–बैंकक उडान सुरु गर्ने भएको छ । आगामी अक्टोबर २ देखि एयरलाइन्सले उडान सुरु गर्नेछ । सुरुमा एयरलाइन्सले हप्तामा ४ दिन उडान गर्नेछ ।

एयर एसियाले आफ्नो वेबसाइटमा प्रकाशित गरेको जानकारी अनुसार सुरुमा प्रवर्द्धनात्मक कार्यक्रम अन्तर्गत निकै सस्तो दरमा उडानको अफर दिइएको छ । यो अफर अनुसार यात्रुले एकतर्फी उडानका लागि मात्रै ९ हजार ९९० रुपैयाँ तिर्नुपर्नेछ ।

सस्तो यात्राको अफर आगामी अक्टोबर २ देखि २०२५ को मार्च २८ सम्मका उडानहरुमा लागू हुनेछ । यो अफर पाउनका लागि १२ अगस्टदेखि २५ अगस्ट भित्रमा टिकट बुकिङ गरिसक्नुपर्नेछ ।

एयरलाइन्सले सुरुमा आइतबार, सोमबार, बुधबार र शुक्रबार उडान संचालन गर्नेछ । यसका लागि एयर एसिया मुभ एपबाट टिकट बुकिङ गर्न सकिनेछ । यसबाहेक एयर एसियाको साझेदार युनिभर्सल टुर्स एण्ड ट्राभल्सबाट पनि टिकट बुकिङ गर्न सकिनेछ । अन्य एयर एसिया एजेन्सीबाट पनि टिकट बुकिङ गर्न सकिने एयरलाइन्सले जनाएको छ ।