एजेन्सी । फ्रान्सेली क्लब पेरिस सेन्ट जर्मेन (पीएसजी)का फरवार्ड नेयमारले लिग वानको पहिलो खेल नखेल्ने भएका छन्। नेयमारले निम्सविरुद्वको पहिलो खेल नखेल्ने भएका हुन् ।

पीएसजीका स्पोर्टिङ डाइरेक्टर लियोनार्दोले २७ बर्षिया खेलाडीले क्लब छाड्ने सम्भावना प्रवल रहेको भन्दै लिग वानको पहिलो खेल नखेल्ने बताएका हुन् । तर उनले क्लबले सरुवाको कुनै अनुमति नदिएको समेत स्पष्ट पारेका छन् ।

विश्वको क्लब फुटबलका सर्वाधिक महङ्गा खेलाडी नेयमार पछिल्लो समय बार्सिलोना वा रियल मड्रिड फर्कन खोजिरहेका छन्। उनी सन् २०१७ मा पीएसजी पुगेका थिए । उनले पछिल्ला दुई सिजनमा ३४ गोल गरेका छन् । तर चोटका कारण दोस्रो सिजनका अधिकांश खेल गुमाउन बाध्य भए ।