काठमाडौं । हिजबुल्लाह लेबनानमा इरानद्वारा समर्थित एक शिया इस्लामिक राजनीतिक पार्टी र अर्धसैनिक संगठन हो। यसलाई सन् १९९२ देखि हसन नसरल्लाहले नेतृत्व गर्दै आएका छन् । यस नामको अर्थ अल्लाहको समूह हो।

हिजबुल्लाह सन् १९८० को दशकको प्रारम्भमा लेबनानमा इजरायलको कब्जा भएका बेलामा इरानको आर्थिक र सैन्य सहयोगमा उभिएको थियो।

हिजबुल्लाहका नेता शेख हसन नसरल्लाहले समूहसँग १० लाख लडाकुहरू रहेको दाबी गरेका छन्, यद्यपि स्वतन्त्र अनुमानहरूले संख्या २० हजार र ५० हजार बीचमा राखेका छन्।

हमासले दक्षिणी इजरायलमा आक्रमण गरेपछि इजरायल र हिजबुल्लाहबीच सीमापार गोलीबारी जारी छ। हमासको आक्रमणमा १२ सय मानिस मारिएका थिए भने २४० जनालाई बन्धक बनाइएको थियो ।

त्यसपछि इजरायलले गाजामा आक्रमण गरेको थियो । हमासको स्वास्थ्य मन्त्रालयका अनुसार हमलामा हालसम्म ४० हजारभन्दा बढी मानिस मारिएका छन् ।

हिजबुल्लाहलाई वर्षौंदेखि इजरायली र अमेरिकी लक्ष्यहरूलाई लक्षित गरी बम विस्फोट र षड्यन्त्र गरेको आरोप लगाइएको छ। पश्चिमी देशहरू, इजरायल, अरब खाडी देशहरू र अरब लीगले हिजबुल्लाहलाई ‘आतंकवादी’ संगठन मान्छन्।