काठमाडौं । पाकिस्तानको बलुचिस्तान प्रान्तमा बन्दुकधारीले बसमा यात्रा गरिरहेका २२ जनाको हत्या गरेका छन् । यी सबै पञ्जाब प्रान्तका थिए । यो घटना बलुचिस्तानको मुसाखेल जिल्लाको हो।

मुसाखेलका सहायक आयुक्त नजीबले घटनाको पुष्टि गर्दै बीबीसी उर्दूलाई भने, ‘घटना जिल्लाको रारा हाशिम क्षेत्रमा भएको हो। प्रहरी नियन्त्रणमा रहेको क्षेत्रमा गएराति गोली चलेको हो ।’

जानकारीका अनुसार केही अज्ञात व्यक्तिहरूले पञ्जाब र बलुचिस्तानको बीचमा चलिरहेका ट्रक र बसहरूलाई रोकेका थिए। त्यसपछि यात्रुलाई तल ओरालियो । उनीहरूले यात्रुको परिचयपत्र जाँच गरे र बलूच नभएकाहरूलाई गोली हाने।

चरमपन्थी समूह बलोच लिबरेशन आर्मीले आक्रमणको जिम्मेवारी लिएको छ र उसले प्रान्तका विभिन्न क्षेत्रबाट सडक अवरुद्ध गरेको जनाएको छ।

बलुचिस्तानका विभिन्न इलाकामा राजमार्गमा हतियारधारी मानिसको उपस्थितिका कारण यातायात अवरुद्ध भएको खबर आएको थियो ।

मारिएका यात्रुहरू पञ्जाब प्रान्तबाट बलुचिस्तान आउँदै थिए।

सरकारी अधिकारीहरुका अनुसार बन्दुकधारीहरुले कैयौं गाडीमा आगजनी समेत गरेका छन् । पछिल्लो २४ घण्टामा बलुच लिबरेशन आर्मीले धेरै सरकारी भवनमा क्षति पुर्याएको छ ।

गोली प्रहारबाट ५ जना घाइते भएकोमा एक जनाको अवस्था चिन्ताजनक रहेको सहायक आयुक्तले जानकारी दिए ।

यसअघि शनिबार र आइतवारको मध्यरातमा बलुचिस्तानका विभिन्न क्षेत्रबाट बम विस्फोट भएको खबर आएको थियो ।

कलात सहरमा भएको आक्रमणमा त्यहाँका सहायक आयुक्त पनि घाइते भएका छन् भने जिउनीस्थित प्रहरी चौकीबाहिर तीनवटा गाडीमा आगजनी गरिएको छ ।

मस्तुङ जिल्लाको खाड कोचा क्षेत्रमा पनि अज्ञात बन्दुकधारीले प्रहरी चौकीमा आक्रमण गरेका छन् ।

बलुचिस्तानका मुख्यमन्त्रीले पछिल्लो घटनाबारे रिपोर्ट मागेका छन्। मुख्यमन्त्री मीर सरफराज बुग्तीले घटनाको निन्दा गरेका छन् । उनले आकस्मिक बैठक पनि बोलाए ।