काठमाडौं । पाकिस्तानको बलुचिस्तानमा बलुच विद्रोहीले ठूलो हमला गरेका छन् । यस हमलामा २४ घण्टाभित्र प्रहरी चौकी, रेलवे लाइन र राष्ट्रिय राजमार्गलाई निशाना बनाइएको छ जसमा सैनिकसहित ७३ जनाको मृत्यु भएको छ। यो आक्रमण विद्रोही प्रभावित बलुचिस्तानमा विगत केही दशकयताकै सबैभन्दा ठूलो आक्रमण हो ।

आक्रमणपछि भएको भिडन्तमा १४ सैनिकको मृत्यु भएको पाकिस्तानी सेनाले जनाएको छ । यस हमलामा २१ बीएलए विद्रोही पनि मारिएका छन् । बलुचिस्तानका मुख्यमन्त्रीका अनुसार ३८ सर्वसाधारणले ज्यान गुमाएका छन् । तीमध्ये राष्ट्रिय राजमार्गमा हतियारधारीले यात्रुलाई रोजेर गोली चलाउँदा २३ जनाको मृत्यु भएको थियो ।

बलुच लिबरेशन आर्मी (बीएलए) ले यस हमलाको जिम्मेवारी लिएको छ। बीएलएले यसलाई अपरेशन डार्क विन्डी स्टर्म नाम दिएको छ। उसले दक्षिणी बन्दरगाह जिल्ला ग्वादरमा एक महिलासहित चार आत्मघाती हमला गरेको बताएको छ । पाकिस्तानी अधिकारीहरूले यसबारे अझै केही बोलेका छैनन् । बलुचिस्तानका मुख्यमन्त्रीले भने आक्रमणमा ३ जनाको मृत्यु भएको बताएका छन् ।

राष्ट्रिय राजमार्गमा आक्रमणका क्रममा हमलाकारीले यात्रुलाई बसबाट निकालेर गोली हानेका थिए । गोलीबारीको यो घटना बलुचिस्तानको मुसाखाइल जिल्लामा भएको हो। सशस्त्र आक्रमणकारीहरूले ट्रक र बसबाट यात्रुहरूलाई ओरालेर पाकिस्तानी पञ्जाबका मानिसहरूलाई पहिचान गरेर गोली हानेका थिए।

बीएलए पाकिस्तान सरकार विरुद्ध लड्ने सबैभन्दा ठूलो विद्रोही समूह हो। बीएलए विद्रोहीहरूले पाकिस्तान सरकारले बलुचिस्तानमा ग्यास र खनिज स्रोतहरूको अनुचित दोहन गरेको आरोप लगाएका छन्। जसका कारण राज्यमा गरिबी छ । बीएलए चीन र बलुचिस्तानको स्वतन्त्रता हटाउन चाहन्छ।