काठमाडौँ । फ्रेन्च लिग वानअन्तर्गत पिएसजीले विजयी सुरुवात गरेको छ । गएराती सम्पन्न खेलमा पिएसजीले निम्सविरुद्ध ३-० को जित हासिल गरेको हो ।

पिएसजीका लागि एडिसन कभानी, किलीयन एम्बाप्पे र एन्जल डिमारियाले एक एक गोल गरेका थिए ।

ब्राजिलियन खेलाडी नेइमारले क्लब छोड्ने विवादका बीच उनको अनुपस्थितिमा पिएसजीले सिजनको राम्रो सुरुवात गरेको हो ।

गत छ सिजनमा लगातार उपाधि जित्दै आएको पिएसजीले जितसँगै नयाँ सिजनको सुरुवात गरेपछि अब पिएसजीलाई नेइमारको आवश्यकता नभएको सन्देश समेत गएको छ ।

यस खेलमा गोल गरेसँगै एम्बाप्पेले सन् २०१९ मा २१ गोल गरेका छन् । उनी सन् २०१९ मा लियोनेल मेसीसँगै २१-२१ गोल गर्ने खेलाडी समेत बनेका छन् ।

यस खेलमा पिएसजीका फ्यानहरु भने नेइमारविरूद्ध उत्रिएका छन् । उनीहरुले यस खेलमा नेइमारलाई गाली गर्दै क्लबबाट छिटो बाहिर जान भन्दै नाराबाजी गरेका थिए ।