काठमाडौं । नाइजेरियाको उत्तरी क्षेत्रमा गएराति एउटा तेल ट्याङ्कर विस्फोट हुँदा ९४ जनाको मृत्यु भएको छ ।

दुर्घटनापछि ट्याङ्करबाट लिक भएको तेल लुट्न आएका मानिसको भीडमा यो घटना भएको हो । यो घटना उत्तरी राज्य जिगावाको माजिया सहरमा भएको हो ।

तेलले भरिएको एउटा ट्याङ्कर पल्टिएर आगो लागेको र कम्तीमा ९४ जनाको मृत्यु भएको प्रहरीले बीबीसीलाई बताएको छ ।

विस्फोटमा अन्य ५० जना घाइते भएका छन्, जसलाई जिगावा राज्यको रिङ्गिम सहर नजिकैको अस्पतालमा भर्ना गरिएको छ। घाइतेहरुको अवस्था गम्भीर रहेको बताइएको छ ।

प्रहरी प्रवक्ता लवल सिजु आदमले भने, “घटना मंगलबार राति भएको हुनाले पुलिस अधिकारीहरूले मानिसहरूलाई ट्याङ्कर नजिक नजान चेतावनी दिएका थिए तर उनीहरूले बढ्दो भीडलाई नियन्त्रण गर्न सकेनन्।”

उनले बीबीसीलाई भने, ‘हामीले गाडी नजिकैको पेट्रोल लिनबाट रोक्न धेरै प्रयास गर्‍यौं। घेराबन्दी गरेर पनि मानिसहरूलाई रोक्न सकेनौं र पेट्रोल भर्ने क्रममा आगलागी भएको हो ।”

स्थानीय समय अनुसार राति ११ः३० बजे उक्त दुर्घटना भएको उनले बताए ।

आदमले भने, “तेल ट्यांकर कानोबाट आउँदै थियो र योबे राज्यको न्गुरुतर्फ गइरहेको थियो। यस क्रममा चालकले गाडीमाथिको नियन्त्रण गुमाए।”

यस घटनामा चालकलाई भने चोटपटक लागेको छैन । प्रहरीले उनलाई नियन्त्रणमा लिएर अनुसन्धान सुरु गरेको छ ।