काठमाडाैं। प्रमुख प्रतिपक्ष माओवादी केन्द्रसहित संसदमा प्रतिनिधत्व गर्ने विपक्षी दलले साेमबार प्रधानमन्त्री केपी ओलीलाई ज्ञापन पत्र बुझाए। साे क्रममा विपक्षी दल र प्रधानमन्त्री ओलीबीच राेचक सवाल जवाफ पनि भएकाे छ।

साे सलाव जवाफलाई प्रधानमन्त्रीका राजनीतिक सल्लाहकार बिष्णु रिमालले सार्वजनिक गरेका छन्।
विपक्षी दल र प्रधानमन्त्रीबीचको संवाद :

विपक्षः पूर्व उपप्रधानमन्त्री एवं गृहमन्त्री रवि लामिछानेको गिरफ्तारी प्रतिशोध हो?

प्रधानमन्त्रीः  मलाई कुनै प्रतिशोधको राजनीति गर्नु छैन । मेरो कसैसँग दूराभाव छैन । मलाई केही लिनु दिनु छैन । मैले त व्यक्ति तोकेर संसदीय छानबिन समिति गठन नगरौँ भनेको थिएँ। अरु दल र स्वयं रविजीले गठन गरौँ भनेपछि समिति गठन भयो । समितिको प्रतिवेदन आएपछि कार्यान्वयन गर्नु सरकारको दायित्व हो।

विपक्षः पूर्वाग्रह, तानाशाही…?

प्रधानमन्त्रीः अहिले कतिपय ठाउँमा मलाई “तानाशाह” भनेर अवाञ्छित गालीगलौज गरिएको छ । थप तिक्तता नहोस् भनेर मैले कुनै जवाफ दिएको छैन । मलाई कुनै स्टन्टबाजी गर्नु छैन । साथीहरुले पनि त्यसो गर्नु राम्रो होइन । मुख्य कुरा हामीले विधि र पद्धतिलाई मान्नुपर्छ र स्थापित गर्नुपर्छ, हामीलाई प्रतिगमन कुनै हालतमा स्वीकार्य छैन । लोकतान्त्रिक पद्धतिलाई छोड्न सकिँदैन ।

विपक्षः राजनीति दलसम्बन्धी अध्यादेश …?

प्रधानमन्त्रीः  विगतमा नेकपा (एमाले)लाई विभाजन गर्न अध्यादेश ल्याइएकाले साथीहरुलाई त्यसै गर्न लाग्यो कि भन्ने परेको हुन सक्छ । तर अहिले कुनै पार्टी फुटाएर एमालेमा मिलाउने हाम्रो योजना छैन ।

विपक्षः विपद र राहतको विषय…

प्रधानमन्त्रीः मनसुनजन्य विपद्को घटनामा घाइते भएकाहरुको निःशुल्क उपचार भइरहेको छ, बेपत्ता भएकाहरुको खोजी कार्य जारी छ, बेलिब्रिजहरुसमेत मगाएर राजमार्गहरुमा भएको अवरोध खुलाइएको छ। यस्ता विषयमा कुनै राजनीति नगरी मिलेर जान मेरो आग्रह छ ।