काठमाडौं । लेबनानको स्वास्थ्य मन्त्रालयले दक्षिणी बेरुतमा इजरायली हवाई आक्रमणमा चार जनाको मृत्यु भएको जनाएको छ । जसमा एक बालक पनि परेका छन् ।

लेबनानको स्वास्थ्य मन्त्रालयले आक्रमणमा २४ जना घाइते भएको जनाएको छ । लेबनानका अनुसार यो हवाई हमला दक्षिणी बेरुतको मुख्य सरकारी अस्पतालमा भएको हो ।

अस्पताल स्रोतहरूले समाचार एजेन्सी रोयटर्सलाई भनेका छन् – हवाई आक्रमण रफिक हरिरी विश्वविद्यालय अस्पतालको कार पार्किङमा भएको देखिन्छ।

यो हवाई हमला सोमबार साँझ दक्षिण बेरुतमा भएको १३ वटा हवाई आक्रमण मध्ये एक थियो।

यी आक्रमणका सम्बन्धमा इजरायली सेनाले उनीहरूले हिजबुल्लाहसँग सम्बन्धित लक्ष्यहरूमा आक्रमण गरिरहेको बताएको छ।

यसअघि सोमबार एक इजरायली प्रवक्ताले मानिसहरूलाई बेरुतका धेरै ठाउँहरूबाट टाढा रहन चेतावनी दिए, यद्यपि रफिक हरिरी अस्पताल यसमा समावेश गरिएको थिएन।