काठमाडौं । इजरायल र हमासबीचको शान्ति सम्झौताका लागि मध्यस्थताबाट पछि हटेपछि कतारको विदेश मन्त्रालयले यस विषयमा विज्ञप्ति जारी गरेको छ ।

यसको कारण स्पष्ट गर्दै परराष्ट्र मन्त्रालयका प्रवक्ताले वार्तामा संलग्न पक्ष गम्भीर नभएको बताए ।

तर, कतारको विदेश मन्त्रालयका प्रवक्ताले यसको अर्थ कतारको राजधानी दोहामा रहेको हमासको कार्यालय बन्द गरिँदैछ भन्ने होइन भनेका छन् ।

आफ्नो साप्ताहिक पत्रकार सम्मेलनमा परराष्ट्र मन्त्रालयका प्रवक्ता डा अल अन्सारीले दोहामा हमासको कार्यालयले काम गरिरहने कुरामा जोड दिए।

उनले वार्ता पुनः सुरु गर्ने निर्णय नभएसम्म वार्ता स्थगित भएको बताए ।

वार्तामा संलग्न पक्षहरू गम्भीर छन् भन्ने कतारलाई लागेमा अगाडि आएर भूमिका खेल्ने उनको भनाइ छ ।

कतारले आफूलाई मध्यपूर्वमा शान्ति स्थापनाकर्ताको रूपमा प्रस्तुत गरेको छ तर इजरायल र हमासबीच जारी द्वन्द्वमा युद्धविराम हुन नसकेपछि गत हप्ता मध्यस्थताबाट पछि हटेको थियो।