काठमाडौं। नेपाल प्रिमियर लिग (एनपीएल) अन्तर्गतको आजको पहिलो खेलमा सुदूरपश्चिम रोयल्सले विराटनगर किंग्स पराजित गरेको छ। सुदूरपश्चिमले विराटनगरलाई ९० रनले पराजित गर्‍यो।

त्रिवि क्रिकेट मैदान कीर्तिपुरमा सुदुरपश्चिमले दिएको १८३ रनको लक्ष्य पछ्याएको विराटनगरले १६.१ ओभरमा सबै विकेट गुमाएर मात्र ९२ रन बनायो।

विराटनगरका बसिर अहमदले सर्वाधिक २४ रन बनाए। यस्तै राजेश पुलामीले १५ तथा अनिल खरेलले १० रन बनाए पनि अन्य ब्याटरले दोहोरो रन बनाउन सकेनन्। सुदुरपश्चिमका स्कट कुगेलेन र अभिनाष बोहोराले ३/३ विकेट लिए।

यसअघि टस हारेर पहिला ब्याटिङको निम्तो पाएको सुदुरपश्चिमले निर्धारित २० ओभरमा ७ विकेट गुमाएर १८२ रन बनाएको थियो। सुदुरपश्चिमका लागि कप्तान दिपेन्द्र सिंह ऐरीले अर्धसतक बनाए। उनले २४ बलमा ३ चौका र ५ छक्काको मद्दतमा ५७ रन बनाए।

यस्तै ब्रेन्डन मक्मुलेनले ३६ तथा बिनोद भण्डारीले २३ र इशान पाण्डेले २१ रन बनाए। विराटनगरका अनिल खरेलले ३ विकेट लिए।