काठमाडौं । बेलायतमा एउटी आमाले आफ्नी छोरीलाई जन्मेदेखि नै तीन वर्षसम्म दराजमा लुकाएर राखेकी थिइन् । यी महिलालाई सात वर्ष ६ महिनाको जेल सजाय सुनाइएको छ । अदालतले यसलाई ‘चरम लापरवाही’ मानेको छ।

यी बालिकाका वकिलले भने, “उनले कहिल्यै उज्यालो देखेकी छैनन्, ताजा हावामा सास फेरेकी छैनन्।” घरमा पाहुना आएका बेला बालिका रोएको सुनेपछि मात्र बालिकाको बारेमा खुलासा भएको थियो ।

बालिकाको सुरक्षालाई ध्यानमा राख्दै बालिका र उनको परिवारका अन्य सदस्यहरुको पहिचान खुलाइएको छैन ।

यो मुद्दा चेस्टर क्राउन कोर्टमा सुनुवाइ भएको थियो। जहाँ यी आमालाई सजाय दिइयो। यस क्रममा बालिकाकी आमाले बालिकामाथि निर्ममता गरेको चारवटा आरोप स्वीकार गरिन् ।

न्यायाधीश स्टीभन एभरेटले भने “महिलाले बालिकालाई कुनै पनि प्रकारको स्नेह र हेरचाहबाट वञ्चित गरेकी थिइन्। ती महिलाले छोरीलाई न त पर्याप्त खाना दिइन् न त बच्चालाई पर्याप्त स्वास्थ्य सेवा दिइन् ।”

उनले भने, “एउटी नवजात बालिकालाई त्यो कोठामा जिउँदो लाशजस्तै बस्न बाध्य पारिएको थियो ।” अदालतले भनेअनुसार यी आमाले बालिकाका दाजुभाइ तथा दिदीबहिनीबाट समेत बालिकालाई लुकाएर राखेकी थिइन् ।

आमाले यी बालिकाको जन्मको खबर आफ्नो पार्टनर अर्थात ती बालिकाका पिताबाट समेत लुकाएर राखेकी थिइन् ।

क्राउन प्रोसिक्युसन सर्भिसकी रेचेल वर्थिङ्टनका अनुसार बालिका फेला परेपछि उनलाई नाम लिएर बोलाउँदा पनि उनले कुनै प्रतिक्रिया दिइनन् ।

अदालतले बालिका गम्भीर कुपोषित भएको बताएको छ । उनी सात महिना उमेरकी मात्रै देखिन्थिन्, जबकि वास्तविकतामा उनी तीन वर्षकी थिइन् । उनी यति कमजोर भइन् कि उनलाई दूध मिसाएर खानेकुरा खुवाइएको थियो ।

बोल्न गाह्रो हुनुका साथै उनलाई अन्य धेरै समस्याहरू पनि थिए, जसको उपचार उनकी आमाले गरेकी थिइनन् ।

बालिकामाथि यो अपराध सन् २०२० को शुरुदेखि नै हुँदै आएको थियो र २०२३ को शुरुवातसम्म जारी रह्यो । घरमा आएका कोही पाहुनाले सिँढीमा उनको आवाज सुनेपछि मात्रै उनी फेला परिन्।

बालिका फेला परेपछि एक सामाजिक कार्यकर्तालाई घरमा बोलाइएको थियो । जब उनी सुत्ने कोठामा गइन्, त्यहाँको दृश्य देखेर उनी डराइन् ।

उनले बालिकाको कपाल निकै जेलिएको र र छालामा पाप्रा रहेको बताइन् । उनले बालिकाकी आमालाई उले बालिकालाई कहाँ राख्छिन् भनेर सोधिन् । जवाफमा आमाले जवाफ दिइन् ‘हो, म दराजमा राख्छु ।’

उनले थप भनिन्, “आमाले कुनै दु:ख वा पश्चात्ताप नदेखाएको देखेर मलाई अचम्म लाग्यो। साथमा आमा बाहेक बच्चाले मलाई मात्र देखेको थाहा पाउँदा झनै डर लाग्यो।”

उचित हेरचाह नपाएका कारण अन्य बालबालिकाको तुलनामा बालिकाको राम्रो विकास हुन नसकेको अदालतले जनाएको छ । अहिले ती बालिका अर्कै परिवारसँग बस्दै आएकी छिन् ।

प्रहरीसँग कुरा गर्दै महिलाले आफू गर्भवती भएको थाहा नभएको र बच्चा जन्माउँदा निकै डराएको बताइन् । महिलाले प्रहरीलाई बालिका ‘आफ्नो परिवारको हिस्सा नभएको’ बताइन्।

न्यायाधीश एभरेटले भने, “मैले मेरो ४६ वर्षको जीवनमा योभन्दा खराब केस कहिल्यै देखेको छैन।”