काठमाडौं । नेपाल प्रिमियर लिगको आजको खेलमा सुदूरपश्चिम रोयल्सका ब्याटर इशान पाण्डेले आउट नभइ क्रिज छोडेका छन् । ११ रनमा १० रन बनाएर खेलिरहेका उले अचानक क्रिज छोडेका हुन् । यसरी क्रिज छाडेपछि ब्याटरलाई रिटायर्ड आउट मानिन्छ ।

इशानले क्रिज छाड्नुभन्दा ठिक अगाडिको बल उनैले खेलेका थिए । उनले छक्काको लागि हानेको बल फिल्डरको हातमै गएको थियो तर फिल्डर मिचेल लिस्कले हातमै आएको बल क्याच लिन सकेनन् । लगत्तै क्याच आउटबाट जोगिएका इशान आफैं क्रिज छाडेर हिँडेका हुन् ।

इशान घाइते भएको जस्तो कुनै संकेत पनि देखिएको थिएन । त्यसैले उनी आफैंले जानीजानी क्रिज छाडेको मानिएको छ । पछिल्लो समय छोटो फरम्याटको क्रिकेटमा कुनै ब्याटरले आफूले ठूला सट खेल्न नसक्ने महसुस गरेमा आफूभन्दा पछाडिका ब्याटरलाई क्रिजमा ल्याउन आफूलाई यसरी रिटायर्ड आउट घोषित गर्ने गरेका छन् । गत सिजनको इण्डियन प्रिमियर लिगमा पनि भारतीय अलराउण्डर रविचन्द्रन अश्विनले यसैगरी क्रिज छाडेका थिए ।