काठमाडौं । भारतीय क्रिकेट टोलीका पूर्वकप्तान विराट कोहलीले भारत छोड्ने भएका छन् । कोहली आफ्नी श्रीमती अनुष्का शर्मा, छोरी वामिका र छोरा अकायसँगै भारत छोडेर स्थायी रुपमै बेलायतमा बस्न लागेको कोहलीका बाल्यकालका कोच राजकुमार शर्माले पुष्टि गरेका छन् ।

हिन्दूस्तान टाइम्सका अनुसार शर्माले विस्तृत विवरण खुलाएनन् तर कोहलीले पहिलेदेखि नै खेल जीवनबाट सन्यास लिएपछि लण्डनमा बस्ने योजना बनाइरहेको खुलासा गरे । पछिल्ला वर्षमा कोहली धेरै पटक लण्डनमा भेटिएका छन् । २०२४ को फेब्रुअरीमा उनका छोरा अकाय पनि लण्डनमै जन्मिएका थिए । शर्माका अनुसार लण्डनमा कोहलीले घर पनि खरिद गरेका छन् र उनले सन्यास लिएपछि उनीहरु यही घरमा बस्न सक्छन् ।

शर्माका अनुसार कोहली छिटै लण्डन जाने योजनामा छन् र पछिल्लो समय उनले क्रिकेटलाई कम समय दिएका छन् र उनले धेरै समय परिवारसँग बिताउँछन् । लण्डनमा छोरा जन्मिएपछि कोहली धेरैजसो समय उतै थिए । उनी जूनमा भारतले विश्वकप जितेपछि एकपटक भारत आएका थिए । त्यसपछि फेरि लण्डनमै बसेका उनी जुलाइमा श्रीलंकाविरुद्ध एकदिवसीय सिरिज खेल्न आएका थिए ।