काठमाडौं। बर्डफ्लुका कारण हालसम्म विश्वभर ३० करोड चराको मृत्यु भइसकेको छ। विश्व स्वास्थ्य संगठनले यो भाइरस अब अन्य प्रजातिमा पनि फैलिरहेको चेतावनी दिएको छ। विश्व स्वास्थ्य संगठनले यसमा द्रुत परिवर्तन पनि आउँदै गरेको बताउदै अवस्था चिन्ताजनक रहेको जनाएको छ।

अमेरिकामा बर्ड फ्लु तीव्र गतिमा फैलिएपछि क्यालिफोर्निया राज्य सरकारले संकटकाल घोषणा गरेको छ। युनाइटेड स्टेट्स सेन्टर फर डिजिज कन्ट्रोल एण्ड प्रिभेन्सनका अनुसार आठ राज्यमा ६० भन्दा बढी मानिस संक्रमित भएका छन्, जसमध्ये अधिकांशलाई हल्का रोग लागेको छ।

लुइसियानामा एक व्यक्ति भाइरसको कारण देशमा पहिलो पटक गम्भीर बिरामी भएको अस्पतालमा भर्ना भएका छन्। क्यालिफोर्नियाका गभर्नर गेभिन न्यूजमले भने कि उनले प्रकोपसँग लड्न राज्यका कामदार र आपूर्तिहरूलाई राम्रो स्थितिमा राख्न आपतकालिन घोषणा गरेका छन्।

विश्व स्वास्थ्य संगठनले यस वर्ष ७६ जनालाई एच५एन १ बाट संक्रमित भएको जनाएको छ, जसमध्ये अधिकांश खेतीपाती कामदार छन्। यी मध्ये ६० भन्दा बढी केसहरू अमेरिकामा रिपोर्ट गरिएको छ जहाँ वन्यजन्तु र कुखुरामा पनि एच ५ एन १ को प्रकोप छ।

यसबाहेक चीन, अष्ट्रेलिया, क्यानडा, कम्बोडिया र भियतनाममा पनि संक्रमण पुष्टि भएको छ। संयुक्त राष्ट्र संघको एजेन्सीका अनुसार एभियन इन्फ्लुएन्जाले प्रोटिनको लागि कुखुराको स्रोतमा धेरै निर्भर हुने क्षेत्रहरूमा खाद्य र पोषण सुरक्षामा गम्भीर खतरा निम्त्याउने सम्भावना छ।

विश्व स्वास्थ्य संगठनका इपिडेमिक म्यानेजमेन्टकी डा. मारिया भान केरखोभले पछिल्लो समय वैज्ञानिक विश्लेषणबाट सर्वसाधारणलाई पर्न सक्ने जोखिमको मूल्यांकन गरिएको छ। यद्यपि, मानवको लागि यो जोखिम अहिले कम अनुमान गरिएको छ । यसका बावजुद, खेतमा काम गर्ने र संक्रमित जनावरहरूको सम्पर्कमा आउने मानिसहरूको लागि जोखिम कम देखि मध्यम छ।

संयुक्त राष्ट्रसंघको खाद्य तथा कृषि सङ्गठन (एफएओ)का डा मधुर ढिङग्रालाई उद्धृत गर्दै संयुक्त राष्ट्रसंघको समाचार वेबसाइटमा एच५ एन१ भाइरस परिवर्तन हुँदै गएको र अहिले वन्यजन्तुमा पनि फैलिरहेको बताएको छ । पछिल्ला तीन वर्षमा पाँच महादेशमा रहेका १०८ देशमा यसको संक्रमण देखिएको छ।