काठमाडौँ । अमेरिकी राष्ट्रपति चुनावमा डोनाल्ड ट्रम्पको जितपछि उनले शपथ नलिदै अर्बपति उद्योगपति एलन मस्क निकै शक्तिशाली बनेका छन् । मस्कले ट्रम्प सरकारमा पनि महत्वपूर्ण भूमिका निर्वाह गर्ने देखिएको छ ।

यस्तो अवस्थामा आइतवार एक कार्यक्रममा डोनाल्ड ट्रम्पलाई भविष्यमा एलन मस्क अमेरिकाको राष्ट्रपति बन्न सक्छन् ? भनेर सोधिएको थियो । यसको जवाफमा डोनाल्ड ट्रम्पले नियमहरू उद्धृत गर्दै त्यो सम्भव नभएको बताएका छन् ।

ट्रम्पलाई एरिजोनाको फिनिक्समा रिपब्लिकन पार्टीको कार्यक्रममा मस्क अमेरिकाको राष्ट्रपति बन्न सक्छन् भन्ने प्रश्न सोधिएको थियो, जसको ट्रम्पले सीधा जवाफ दिँदै भने- ‘होइन… यस्तो हुने छैन।’

ट्रम्पले भने, ‘के तपाईलाई थाहा छ उनी किन राष्ट्रपति बन्न सक्दैनन् ? वास्तवमा उनी अमेरिकामा जन्मिएका होइनन् ।’ अमेरिकी संविधान अनुसार अमेरिकामा जन्मेको व्यक्ति मात्रै अमेरिकाको राष्ट्रपति बन्न सक्छ जबकी मस्कको जन्म दक्षिण अफ्रिकामा भएको थियो ।

आफ्नो सरकारमा ट्रम्पले सरकारी खर्च नियन्त्रण गर्ने जिम्मेवारी एलन मस्कलाई दिएका छन् । भर्खरै, जब खर्च विधेयक ल्याइएको थियो, ट्रम्पसँगै मस्कले रिपब्लिकन सांसदहरूलाई उक्त विधेयकलाई समर्थन नगर्न धेरै दबाब दिएका थिए ।

जसका कारण अमेरिकामा शटडाउनको अवस्था सिर्जना भएको थियो, जसका कारण क्रिसमसको अवसरमा मानिसहरुले निकै समस्याको सामना गर्नुपरेको थियो । तर, नयाँ विधेयक ल्याएपछि बन्दको अवस्था टरेको छ । तर यो सम्पूर्ण घटनाले धेरै रिपब्लिकन सांसद र डेमोक्र्याट सांसदहरू रिसाएका थिए ।

डेमोक्रयाट सांसदहरूले एक निर्वाचित नागरिकले सरकारमा यति धेरै शक्ति कसरी हुन सक्छ भन्ने प्रश्न उठाएका थिए । केही डेमोक्र्याट सांसदहरूले पनि ट्रम्प सरकारलाई गाली गर्दै मस्कलाई ‘राष्ट्रपति मस्क’ भन्न शुरु गरेका छन् ।